Кина доби повеќе од 1.400 регистрирани музеи во текот на изминатите пет години, со што вкупниот број на национално ниво достигна 7.188 до крајот на 2025 година, според статистиката објавена од Националната администрација за културно наследство. Повеќе од 91 отсто од овие музеи се отворени за јавноста бесплатно. Во текот на изминатата година музеите низ целата земја беа домаќини на повеќе од 40.000 изложби и организираа над 580.000 образовни активности, привлекувајќи над 1,56 милијарда посети. Главните индикатори достигнаа рекордни нивоа, бидејќи музеите продолжија да ги подобруваат јавните културни услуги и да го прошируваат општествениот ангажман. Кинеските музеи, исто така, продолжија да ја продлабочуваат меѓународната културна размена. Во 2025 година беа одржани повеќе од 110 странски изложби на кинески културни реликвии и над 240 влезни изложби, опфаќајќи над 20 земји и региони на четири континенти.
Светскиот рекорд на посетеност за да се види изложбата „На врвот на пирамидата: Цивилизацијата на Стар Египет“ на музејот во Шангај од нејзиното отворање во јули 2024 година не претставуваше изненадување за набљудувачите на растечката фасцинација на Кина со посетувањето музеи. Настанот уште тогаш ја претставуваше најпосетената единечна платена изложба меѓу музеите во светот, со над 2,77 милиони посети и повеќе од 106,75 милиони долари генерирани приходи.
Четиринаесеттиот петгодишен план (2021-2025) поттикна посилен музејски систем во Кина, а големите достигнувања во археолошките студии им дадоа на музеите нова виталност, овозможувајќи им да ѝ презентираат нови блескави изложби на јавноста.
– Во текот на периодот на 14-от петгодишен план, побарувачката на јавноста за музеи стануваше сè поочигледна – рече Пан Шоујонг, професор по музеологија на Универзитетот во Шангај.
Тој додаде дека зад видливиот пораст на бројот на музеи, изложби и посети стои силна поддршка и од владата и од поширокото општество. За подобро да се промовира развојот на музеите – Кина ги засили напорите за изградба на музејски ешалони со консолидирање на системот за оценување на музеите, според Пан.
Овој систем регулира три нивоа на музеи низ целата земја врз основа на нивните перформанси во управувањето и инфраструктурата; нивното управување со колекциите и научните истражувања; и нивните изложбени и социјални услуги. Сите овие фактори даваат насока за понатамошни подобрувања.
Музеите, вклучувајќи ги Националниот музеј на Кина и Музејот на палатата во Пекинг и 15 клучни музеи, се поддржани и од централната и од локалната власт. Тие се силни кандидати да станат музеи од светска класа. Другите музеи ќе имплементираат систем за класификација. Според најновото групирање на музеите од прв, втор и трет ред во Кина, вкупниот број на такви музеи достигна 1.660 и ги задоволува различните потреби на посетителите.
Пекинг, како и покраините Шанкси, Нанџинг и Џангсу, ги интегрираа своите богати музејски ресурси во развојот на градовите што се обидуваат да се развијат во „градови на музеи“. Достигнувањата на музеите се неразделни од подемот на археолошката работа во Кина.
