Тој со овој резултат постигна минимум норма за учество на Светското првенство (СП) во Кореја во 2026 година
ГРАНПРИ-ТУРНИР ВО ПАРАСТРЕЛАШТВО „НОВИ САД 2025“
Во Нови Сад, Србија, се одржува Гранпри-натпревар во парастрелаштво, на кој учествуваат спортисти од 31 држава, веројатно најголем број на држави учесници откако се организира овој турнир, кој ќе заврши утре. Овој натпревар наедно е и генерална проба пред одржувањето на Европското првенство (ЕП) во парастрелаштво во Осиек, Хрватска, на почетокот на октомври годинава, па присуството на толкав број на учесници од рекорден број држави е и сосема очекувано.
– Македонија на овој натпревар ја претставува Александар Јовановски, кој засега настапи во дисциплината воздушен пиштол од 10 метри и, со постигнат резултат од 543 круга (90, 91, 91, 92, 95, 84), го освои 11-то место од вкупно 31 натпреварувач. Штета што во последната серија влезе во временски недостиг, па направи неколку грешки, а беше многу блиску до пласман во финалето. Александар со овој резултат постигна минимум норма за учество на Светското првенство (СП) во Кореја во 2026 година, од кое започнуваат и квалификациите за следните Параолимписки игри (ПОИ) во Лос Анџелес (САД) во 2028 година – вели претседателот на Македонскиот параолимписки комитет и селектор на македонската параолимписка репрезентација во стрелаштво, Бранимир Јовановски.
Следна дисциплина во која ќе настапи Александар Јовановски е П4-малокалибарски пиштол на 50 метри, која, според програмата, треба да се одржи денеска. Г.И.
