По големиот успех на минатогодишниот Саем на книгата со еден од најчитаните автори кај нас, Крис Картер, оваа година од „Сакам книги“ најавуваат уште еден саемски спектакл за сите книгољупци. Како што велат од издавачката куќа „Сакам книги“, Алис Фини, амбициозната авторка на напнати и непредвидливи трилери, со саксонска доза мистерија и заплет, ве поканува на уште едно несекојдневно искуство. Алиса Фини е авторка на добропознатите „Понекогаш лажам“, „Тој и Таа“ и „Камен лист ножички“, преведени на македонски, а има и уште неколку други дела. Нејзините романи се преведени на над дваесет и пет јазици, а дел од нив имаат и екрански адаптации.
– Оваа визионерка, која порано работела како новинарка на Би-би-си, ќе се сретне со македонските читатели на 19 април, со почеток од 16 часот, во салата „Борис Трајковски“, во рамките на Саемот на книгата. Таму ќе потпишува примероци од своите книги и ќе го промовира својот нов роман „Добра и лоша“. Алиса Фини е позната по својата вештина да пишува катаклизмични трилери со сложени заплети, мрачни ликови и завршетоци што ќе ве шокираат до срж. Од нејзиниот деби-трилер „Понекогаш лажам“, до последниот роман „Добра и лоша“, Фини знае како да ги носи своите читатели на диви возења од почеток до крај – велат од издавачката куќа.
Најавени се и промоции на пет нови романи од македонски автори, дел од едицијата „Наши, а светски“. Тоа се Кирил Ангелов со деби-романот и автобиографско дело „Безсловен“, Далибор Трајков со својот нов трилер „Тајната на монахот“, Гордана Такец со деби-романот по вистинска животна приказна „Капирења“, Лепа Гештаковска Христовска со „Италијанскиот ракопис“ и Ксенија Николова со „Зад маските“. Сите домашни автори исто така ќе потпишуваат примероци и ќе се дружат со читателите на штандот на „Сакам книги“ на годинашниот Саем на книгата.
