Во првата година од проектот, шпанската влада делумно ќе ги финансира трошоците за плати на компаниите што го намалуваат работното време и исто така ќе помогне во финансирањето на обуката и трошоците за мерките за подобрување на продуктивноста
Шпанија започна пилот-проект за да им помогне на малите и средните индустриски компании да ја намалат работната недела најмалку за половина ден без да ги намалат платите, во обид да ја зголемат продуктивноста. Компаниите што бараат помош мора да најдат начини за зголемување на продуктивноста, што ќе го компензира пречекорувањето на трошоците на платите, истакна Министерството за индустрија во соопштението за печатот во кое се наведува планот од 10 милиони евра. Овие подобрувања треба да се спроведат во рок од една година, додека компанијата мора да ја одржува програмата најмалку две години.
Дебатата за таканаречениот „скандинавски модел“, кој смета дека продуктивноста ќе се зголеми ако се намали работното време, не е нова, но таа доби сила за време на пандемијата меѓу компаниите, јавниот сектор и политичарите.
Во првата година од проектот, шпанската влада делумно ќе ги финансира трошоците за плати на компаниите што го намалуваат работното време и исто така ќе помогне во финансирањето на обуката и трошоците за мерките за подобрување на продуктивноста. Само работниците со редовен договор на неопределено време можат да бидат дел од програмата, а жените треба да бидат застапени според нивниот удел во работната сила на компанијата. Најмалку 30 отсто од работната сила мора да го намалат работното време ако компанијата има до 20 работници, додека ако компанијата има меѓу 21 и 249 вработени најмалку 25 отсто од нејзините работници мора да бидат дел од планот.
Шпанскиот телекомуникациски гигант „Телефоника“ им понуди на своите вработени можност да работат во четиридневна недела, продолжувајќи ја пилот-програмата во која првично беа вклучени околу 150 работници, но во замена за намалување на платите за 12 отсто.
