Во организација на Комуната на Власите „Браќа Манаки“ и кино-клубот „Студио
Милтон Манаки“, на Влашките гробишта во Битола, денеска се одржа чествување по
повод 59 години од смртта на Милтон Манаки.
Во чест на првиот снимател на Балканот, свежо цвеќе на неговиот гроб положија
градоначалникот на општина Битола, Тони Коњановски, претставниции на Советот на
општината, како и други делегации – претставници на институции и асоцијации кои го
негуваат делото и творештвото на Браќата Манаки.
– Се собравме овде на гробот каде е погребан Милтон Манаки да одадеме достојна
почит на еден од великаните на кинематографијата и зачетоците на кинематографијата на Балканот. Битола е почестена што Браќата Милтон и Јанаки Манаки, биле дел од
историјата на градот. Затоа, заедно тука се договоривме, идната година, кога се
навршуваат 60 години од смртта на Милтон Манаки, подостоинствено да го одбележиме
тоа, за што се договоривме да формираме Иницијативен одбор кој ќе се погрижи за
одбележувањето, затоа што навистина, на вакви великани, Битола треба достојно да им се оддолжи – рече градоначалникот на општина Битола, Тони Коњановски, прифаќајќи ја иницијативата на претставниците на клубот „Милтон Манаки“.
Претседателот на клубот „Студио Милтон Манаки“, Стевче Хаџиантоновски, изрази задоволство од активностите преземени за трајното зачувување на фондот на браќата Манаки.
– Делото на Манаки, денес знаеме се чува на две места, дел во Кинотека на
Македонија, тоа е филмскиот опус, а додека останатиот, фотографскиот опус, се чува во нашиот Архив. Мене ми е многу мило што се презедоа одредени акции околу трајното зачувување на тој фонд, што ќе претставува големо историско и културно богатство, не само за Битола и Македонија, туку и за целиот Балкан. Заслугата на Милтон и Јанаки Манаки е огромна. Заедно твореле и создавале, а заслугата на Јанаки е дотолку голема што успеал, поголемиот опус од нивното творештво да го зачува, за денес да го имаме ние и да го презентираме пред јавноста. Делото е големо и треба да се почитува и вреднува. Сакам да покренеме иницијатива, за догодина, кога ќе одбележуваме 60 години од неговото упокојување во градот да се направи една поголема манифестација во негова чест, но и во чест на Јанаки – рече Хаџиантоновски. М.М.
