Големиот пожар што околу 13 часот ја зафати прилепската конфекциска фабрика „Тила“ е локализиран, но се уште пожарникарите работат да ги доизгаснат некои горливи материјали во објектот.
Според командирот на прилепската противпожарна единица Кристијан Момироски, пожарникарите довечер ќе останат на теренот.
– Пожарот е локализиран, отстранета е опасноста да не бидат зафатени соседните објекти. Кога почнало да гори, за среќа, никој немало во конфекцијата. Моментално пожарникарите догаснуваат некои горливи материјали во објектот и на покривната конструкција, а тоа може да трае довечер – изјави Момироски.
На гаснењето на големиот пожар што ја зафати конфекциската фабрика за детска облека „Тила“ повеќе од четири часа работат 16 пожарникари, пет противпожарни возила, комплетна опрема од противпожарната станица во Прилеп, а напомош на пожарникарите им беа испратени три цистерни од јавните комунални претпријатија. Во објектот немало никој кога избувнал пожарот од покривната конструкција каде се монтирани сончевите панели.
– Интервениравме со пет возила, 15 пожарникари. На припомош дојдоа две цистерни од ЈКП „Водовод и канализација“ и од „Комуналец“ и кран од приватна фирма. Брзо интервениравме и не дозволивме пожарот да се префрли на соседните објекти.Неколку часа гасневме, а ако треба и ќе дежураме – велат од ТППЕ.
Комшиите велат дека пред да се појави огнот слушнале пукање по што ја повикале пожарната.
Соседот Раде Аљакоски чија куќа е веднаш до фабриката, вели дека пожарникарите брзо стигнале.
– Добив телефонски повик и некој кажа дека нешто гори. Излеговме надвор, прво ништо не видовме, а куќа до куќа сме со конфекцијата. Слушнавме силно пукање, од другата страна видовме голем чад. Благодарност голема, пожарната стигна навреме и сите други институции. Ние како соседи максимално се вложивме, помогнавме. Објектот не работеше, внатре немаше никој. Цело време се работи. Тешко, огромна штета – рече Аљакоски.
Сопствениците на прилепската конфекциска фабрика каде има дваесетина вработени се длабоко потресени од пожарот кој направи огромни штети. Велат дека објектот бил осигуран.
Допрва ќе се утврдуваат причините за избувнувањето на пожарот на прилепската конфекција кој почна да се шири од покривната конструкција.
