Спречени се обиди за криумчарење на икони, цигари, стоматолошка опрема, 100 тегли маџун и пет килограми зачин шафран чија цена е 1.500 евра од килограм, што во различни случаи лица се обиделе нелегално да ги внесат во државата. Стоката во сите случаи е запленета, а против лицата се поднесени соодветни пријави, информираше денеска Царинската управа.
На граничниот премин Богородица царинските службеници спречиле обид за нелегално внесување на црковни предмети меѓу кои и 51 икона, свеќници, нараквици со монистри како и 260 килограми темјан, со проценета вредност од 140 илјади денари, при што е избегнато плаќање на царински давачки од 50 илјади денари. Црковните предмети се пронајдени во камион со регистарски таблички од Босна и Херцеговина, управуван од босански државјанин, кој транзитирал преку нашата држава од Република Грција кон Република Хрватска и превезувал спортска опрема. Непријавените црковни предмети се пронајдени во товарниот дел на приколката помеѓу декларираната стока.
Во друг случај на граничниот премин Меџитлија, царинските службеници спречиле два одделни обида за нелегално внесување непријавени цигари во државата. Во двата случаја се откриени вкупно 28 штеки со цигари во две товарни моторни возила со македонски регистарски таблички и управувани од македонски дравјани, од ист превозник. И двата камиони биле натоварени со кварцен камен – стока наменета за транзит. Во двата случаи штеките со цигари се пронајдени скриени во кабините на возачите, во просторот на горниот кревет, покриени со јакни и лични предмети.
На влез на Деве Баир, пак, при контрола на патничко моторно возило со косовски регистраски таблички во багажот на возилото се откриени 100 тегли маџун коишто патниците не ги пријавиле.
При контрола на возило на царинска испостава Делчево е пронајдена и стоматолошка опрема која возачот ја сокрил во џебовите од јакната и во пределот зад предните седишта кои биле сокриени во мали кеси и кутии спакувани во книжна кеса со облека.
Во еден случај се запленети и пет килограми сув кршен шафран ,,KIAM GOHAR” коишто царинските службеници на влез на Табановце ги откриле при контрола на товарно моторно возило со македонски регистарски таблички. Шафранот е откриен околу предните седишта, во хартиени кеси.
