Пазарот на криптовалути влегува во подолга фаза на корекција под влијание на заострената реторика на Федералните резерви, растечките геополитички тензии и прелевањето на капиталот кон акции на компании од секторот за вештачка интелигенција. Според проценките на аналитичарите, биткоинот би можел да го тестира нивото од 70.000 долари до крајот на мај, пренесе МИА.
Александар Баришников, управник на фондот „Мајнинг“ во УК „Рекорд капитал“, изјави дека во периодот од 11 до 17 мај биткоинот изгубил 5,78 проценти од вредноста и се спуштил на 77.457 долари. Во истиот период, етереумот забележал уште поголем пад од 10,13 проценти, достигнувајќи цена од 2.131 долар, додека алткоините продолжиле да губат позиции на пазарот.
Според него, значителен дел од капиталот се пренасочува кон акции на компании поврзани со вештачка интелигенција, кои бележат силен раст по одлуката за укинување на ограничувањата за извоз на чипови на НВИДИА во Кина.
Дополнителен притисок врз криптопазарот создава и влошеното макроекономско опкружување. Последните податоци за инфлацијата во САД ги засилија очекувањата дека Федералните резерви ќе продолжат со строгата монетарна политика.
Воедно, новиот претседател на ФЕД, Кевин Ворш, порача дека останува посветен на рестриктивните економски мерки, што дополнително ги зголеми притисоците врз финансиските пазари и криптовалутите.
