ТЕНИС
САД опен одреди најголем награден фонд во историјата на гранслем-турнирите
Отвореното првенство на САД ќе понуди најголем награден фонд во историјата на гранслем-турнирите, со вкупно 108 милиони долари, што е зголемување од 20 отсто во однос на минатата година, пишува „Би-би-си“. Шампионите во поединечна конкуренција ќе добијат по 5,5 милиони долари, што е зголемување од 10 отсто во однос на 2025 година. Поразените во првото коло ќе понесат дома по 140.000 долари, за 30.000 долари и 27 отсто повеќе од минатата година.
Наградниот фонд вклучува придонес од два милиони долари во фонд за социјална помош, што водечките тенисери го бараат од сите гранслем-турнири, пишува „Би-би-си“. Четирите гранслем-турнири, исто така, заеднички го објавија формирањето на совет на играчи на гранслем-турнири. Тоа беше уште едно клучно барање од играчите, од кои некои ги ограничија медиумските настапи на Отвореното првенство на Франција и на Вимблдон на 15 минути за да ги истакнат своите забелешки, пишува „Би-би-си“. Нивното друго главно барање е секој гранслем да издвојува 16 отсто од своите приходи за наградниот фонд, а бројката да се зголеми на 22 проценти до 2030 година. Н.М.
АТЛЕТИКА
Дуплантис победи на историскиот натпревар во скок со стап во Лозана
Мондо Дуплантис прескокна 6,21 метри за да победи на историскиот натпревар во скок со стап против Емануил Каралис, кој прескокна 6,16 метри, за време на градскиот натпревар во рамките на атлетската Дијамантска лига во Лозана (Швајцарија), на брегот на Женевско Езеро, пишува Светската атлетика (СА).
Швеѓанецот Дуплантис го подобри својот рекорд од 6,15 метри и не ја собори летвичката на патот до неговиот нов рекорден настап, но Каралис од Грција му понуди силен предизвик бидејќи успеа да прескокне 6,16 метри, втор најдобар резултат во неговата кариера.
Двократниот олимписки шампион потоа се обиде да прескокне 6,32 метри, еден сантиметар повеќе од неговиот светски рекорд, поставен во Упсала во март годинава, но тој реши да го заврши натпреварот по два обида на таа височина.
– Уморен сум. Но се чувствувам навистина добро, се чувствувам навистина среќно. Тоа беше толку неверојатно натпреварување, сите скокаа толку добро. Среќен сум што скокнав навистина добро – рече Дуплантис, пренесе СА.
На епското натпреварување во скок со стап, тројца други атлетичари надминаа 5,91 метри, Куртис Маршал беше трет, Сондре Гутормсен четврти и Крис Нилсен петти. Н.М.
ФУДБАЛ
Почнуваат сезоните во три од најсилните европски првенства
По шпанската Ла лига, чие прво коло почна пред една недела, викендов почнуваат сезоните во уште три домашни првенства од најсилните пет во Европа, англиската Премиер-лига, француската Лига 1 и италијанската Серија А. Идната недела е првото коло и во германската Бундеслига.
Во Шпанија уште викендов прва средба сезонава ќе одигра првакот Барселона, в недела на гости со Елче, а сезоната ја отвораат и Реал Мадрид, Валенсија, Селта, Сосиедад, Осасуна, Бетис и Атлетик Билбао. Во Англија шампионот Арсенал синоќа ја почна одбраната на титулата со дуелот дома со новакот Ковентри, во Италија првакот Интер вечерва ја пречекува Монца, а во Франција за европскиот и француски шампион првиот натпревар е утре, на гости со Рен. Во Германија на програмата е мечот од Суперкупот, вечерва помеѓу Баерн и Борусија Дортмунд. Н.М.
