Фотографиите од одмор што ги објавуваме на Инстаграм или Фејсбук можат да откријат многу повеќе отколку што мислиме. Нов вид измама користи вештачка интелигенција (ВИ) за да ја препознае локацијата на која е направена фотографијата, а потоа таа информација се користи за лажните пораки да изгледаат многу поверодостојно, пишува Гардијан (The Guardian).
Сценариото може да изгледа сосема реално: сте објавиле неколку фотографии од Порто, а по неколку дена добивате порака дека банката забележала „сомнителна активност додека сте престојувале во Порто“ и од вас бара веднаш да го потврдите профилот преку приложен линк. Бидејќи локацијата е точна, жртвата полесно може да поверува дека пораката навистина доаѓа од банката.
Компанијата за компјутерска безбедност Макафи тестирала повеќе од 21.000 фотографии од патувања со два јавно достапни модели на ВИ. Едниот правилно ја идентификувал локацијата на 91 процент од фотографиите, а другиот на 87 проценти. За тоа не биле потребни ниту означена локација ниту податоци зачувани во фотографијата – ВИ користела детали како архитектура, знаци, линии на улиците, пејзаж и други визуелни траги.
Најлесно се препознаваат фотографии со познати знаменитости, продавници или натписи, но и наизглед безлична фотографија од плажа или хотелска соба понекогаш може да открие барем во која земја престојува човекот. За измамниците и тоа може да биде доволно за да состават убедлива порака.
Експертите советуваат фотографиите од патувањата да се објавуваат откако ќе се вратите дома и пристапот до нив да биде ограничен на луѓе што ги познавате. Особено внимание треба да предизвикаат пораки што бараат итна реакција. Наместо да се отвори линкот во пораката, банката или компанијата треба да се контактира преку нејзината официјална веб-страница или преку проверен телефонски број.
