Прометот во индустријата во април годинава е зголемен за 7,3 проценти во споредба со истиот месец минатата година, покажуваат најновите податоци на Државниот завод за статистика (ДЗС), пренесе МИА.
Според главните индустриски групи, на годишно ниво најголем раст е забележан кај капиталните производи, каде прометот е зголемен за 12,7 проценти. Пораст има и кај интермедијарните производи, без енергија, од 3,4 проценти, како и кај нетрајните производи за широка потрошувачка, каде е регистрирано зголемување од 4,5 проценти.
Намалување на прометот е евидентирано единствено кај трајните производи за широка потрошувачка, и тоа за 3,4 проценти во однос на април минатата година.
На месечно ниво, односно во споредба со март 2026 година, вкупниот промет во индустријата бележи пад од 1,8 проценти.
Во првите четири месеци од годинава, од јануари до април, вкупниот промет во индустријата е повисок за 0,2 проценти во однос на истиот период лани.
Прометот на домашниот пазар во април годинава е зголемен за 4,5 проценти во споредба со април 2025 година, додека во периодот јануари – април е регистриран раст од 2,0 проценти.
На странските пазари, пак, индустрискиот промет во април бележи годишен раст од 8,7 проценти. Сепак, во првите четири месеци од годинава, во споредба со истиот период минатата година, евидентирано е благо намалување од 0,2 проценти.
Податоците на ДЗС покажуваат дека и покрај месечниот пад, индустријата во април остварила солиден годишен раст, пред сè поттикнат од зголемената активност кај капиталните производи и подобрите резултати на странските пазари.
