АТЛЕТИКА
Томпсон оствари најдобар светски резултат на 150 метри
Олимпискиот и светски освојувач на сребрен медал на 100 метри од Јамајка, Кишане Томпсон, истрча најдобар светски резултат на 150 метри, со време 14,92 секунди, на атлетскиот митинг Мирамар, во рамките на Сребрената континентална атлетска турнеја во Флорида (САД), пишува Светската атлетика (СА). Овој резултат е подобар во однос на претходниот најдобар светски резултат од 14,97 секунди, поставен од Линфорд Кристи во 1994 година, иако се постигнати побрзи времиња на ова растојание на права патека, пишува СА. Второто место го освои олимпискиот и светски финалист на 200 метри од Зимбабве, Тапиванаше Макараву, со време од 14,96 секунди, исто така подобро од претходниот најдобар светски резултат. Тиа Клејтон ја комплетира двојната победа на Јамајка на патеката од 150 метри, победувајќи во трката за атлетичарки со време од 16,87 секунди, пред нејзината сонародничка Бријана Вилијамс (16,92 секунди) и нејзината сестра близначка Тина Клејтон (17 секунди), пишува СА. Н.М.
ВЕЛОСИПЕДИЗАМ
Моќниот Погачар израмни победнички рекорд
Актуелниот победник Тадеј Погачар третпат триумфира на Трката околу Фландрија, со што изедначи рекорд на импозантен начин, откако го победи Матие ван дер Поел, издвојувајќи на 18 км од целта, по што словенечкиот велосипедист ги освои двете монументални трки сезонава, бидејќи триумфира неодамна и на трката Милано-Сан Ремо, пишува „Би-би-си“. Погачар се израмни со Ван дер Поел и со шест други велосипедисти, со по три победи на белгиската трка (победи и во 2023 година). Тој сега има 12 победи на монументалните трки, петте најпрестижни еднодневни трки за велосипедисти, со што е на второто место на листата, веднаш зад Еди Меркс, кој има 19.
На своето деби во Фландрија, двојниот олимписки шампион Ремко Евенепул го победи сонародникот од Белгија Ваут ван Ерт за третото место во трката од 278 км, која вклучува тешки искачувања и голем број калдрмисани делови. Погачар победи на сите три трки сезонава, а ако биде прв на трката Париз-Рубе викендов, ќе стане само четвртиот што ги освоил сите пет монументални трки, по белгиското трио Меркс, Рик ван Лој и Роџер де Влеминк, пишува „Би-би-си“.
Европската првенка Деми Волеринг (Холандија) третпат победи на една монументална трка, со триумфот на Трката околу Фландрија за велосипедистки, со 45 секунди предност пред Полин Феран-Прево и Пук Питерс, пишува „Би-би-си“. Н.М.
