Во Женева завршија преговорите меѓу високо рангирана американска делегација и претставници на Украина, Германија, Франција и Велика Британија за мировниот план за Украина предложен од американскиот претседател Доналд Трамп.
Американскиот државен секретар Марко Рубио вели дека денешните состаноци биле „најпродуктивните и најзначајните“ во мировниот процес досега.
По овие разговори, Рубио изјави дека американскиот тим работи на „одредени измени“ во мировниот план, очигледно врз основа на украинските предлози. Најконтроверзниот дел за Украинците, но и за Европејците, е делот за предавање на целиот Донецк на Русија, а Европа во својот контра-предлог објави дека разговорите за територијата треба да се водат откако ќе се постигне прекин на огнот на сегашната линија на фронтот.
Тој додаде дека сè уште има работа пред нив и дека можеби подоцна ќе дадат дополнителни информации, а потоа рече: „Имаме многу добар работен документ кој веќе е изграден врз темелите на предлозите од сите релевантни засегнати страни, а сега успеавме да разгледаме некои од тие точки, една по една.
– Мислам дека постигнавме добар напредок. Нашите тимови се повлекоа во своите простории и работат на некои од предлозите што ни беа презентирани, па ги разгледуваме и правиме промени со надеж дека дополнително ќе ги стесниме разликите и ќе се приближиме до решение со кое и Украина и, се разбира, САД ќе се чувствуваат удобно“ – рече Рубио.
Тој исто така нагласи дека секој план бара одобрение од претседателот на САД, Доналд Трамп, но дека е „целосно смирен“ во врска со тоа.
