За време на отворањето на музејот Лувр во Париз изутрината се случил грабеж, соопшти француската министерка за култура Рашида Дати на својот профил на мрежата „Икс“.
– Поради грабежот, донесена е одлука културната установа, музеј Лувр да се затвори за посетители од вонредни причини – се вели во соопштението за медиумите објавено од музејот на таа социјална мрежа, пренесува дневниот весник „Фигаро“.
Инцидентот наводно се случил во моментот кога првите посетители почнале да влегуваат во музејот, по што веднаш била распоредена полицијата, а посетителите биле предупредени да не влегуваат во музејот.
Според францускиот весник „Ле Паризиен“, неколку лица успеале да украдат накит од музејот Лувр во Париз, утрово.
Според првичните наоди од истрагата, крадци со качулки го искористиле пристапот до зградата на брегот на Сена, каде што се во тек градежни работи. Тие користеле товарен лифт за да стигнат директно до една соба во галеријата „Аполон“.
Откако ги скршиле прозорците, двајца од нив влегле во зградата, додека третиот останал надвор. Крадците украле девет парчиња од колекцијата накит на Наполеон и царицата: ѓердан, брош, тиара итн. Тие избегале со скутер.
Според внатрешен извор во Лувр, познатиот „Регент“, најголемиот дијамант во колекцијата, со тежина од повеќе од 140 карати, не е украден. Штетата сè уште не е проценета.
Шефот на полицијата најави вонредна прес-конференција за попладнето на која ќе ги презентира најновите информации за истрагата.
Француската министерка за култура објави дека во неделата се случил грабеж во музејот Лувр. „Нема повредени“, напиша Рашида Дати на социјалните мрежи.
– Јас сум на лице место со музејските екипи и полицијата. Истрагата е во тек – додаде Дати.
Зградата е затворена за посетители до понатамошно известување. „Музејот Лувр ќе биде затворен денес поради исклучителни околности“, се вели во официјалниот „Икс“ профил на музејот.
Посетителите што биле во музејот уште се внатре и не можат да излезат.
