Тринаесет пропалестински демонстранти беа уапсени по хаотичните судири со полицијата во Бостон. Четворица полицајци беа однесени во локалните болници со повреди по судирите – соопштија властите.
– Сите уапсени за време на протестот се на возраст меѓу 19 и 27 години – соопшти полицијата.
Тие ќе бидат изведени пред суд в среда и четврток, а повеќето ќе се соочат со обвиненија за нарушување на јавниот ред и отпор при апсење.
Снимките на локалните медиуми покажаа како демонстрантите и полицајците се туркаат, па дури и се борат по земја. Видеото покажува како демонстрантите викаат „Оставете го на мира“ додека полицајците приведуваат некого.
Протестот беше еден од многуте низ целиот свет што се совпадна со втората годишнина од нападот на Хамас врз јужен Израел што ја предизвика војната во Газа. Милитантите на Хамас убија околу 1.200 Израелци и киднапираа 251, а Израел одговори со масовна воена кампања за која здравствените службеници во Газа велат дека убила повеќе од 67.000 Палестинци.
