Никола Тесла верувал дека целиот универзум е проткаен со енергија и дека сè што постои во својата суштина е вибрација. Неговата позната мисла дека ако сакаме да ги разбереме тајните на универзумот, треба да размислуваме во смисла на енергија, фреквенција и вибрации, стана почетна точка за многу современи теории што ги поврзуваат науката и духовноста.
Тесла верувал дека животот може да се разбере како хармонија на овие невидливи енергетски текови и дека здравјето на човечкото тело е тесно поврзано со тоа колку добро е усогласено со природните вибрации на светот. Овој негов став ги отвори вратите кон идеите што ги препознаваме денес во енергетската медицина – дисциплина што се стреми да ја врати рамнотежата во човечкото тело токму преку работа со енергија.
Енергетската медицина се занимава со енергетски полиња и енергетски текови во и околу човечкото тело. Овој вид алтернативна медицина се потпира на античките знаења и традиции, како и на современите истражувања и теории за енергијата и материјата, и тврди дека здравјето и болеста можат да се подобрат или да се коригираат преку различни техники што влијаат на енергијата.
Целта на енергетската медицина е да се воспостават рамнотежа и хармонија помеѓу различните нивоа на постоење: физичко, ментално, емоционално и духовно. Енергетската медицина верува дека секое од овие нивоа е поврзано и влијае на другите, па затоа е потребно да се лекува целата личност, а не само нејзините симптоми. Овој вид алтернативна медицина се стреми да го поттикне самолекувањето и да спречи болести.
Енергетската медицина има различни пристапи и методи, и инвазивни и неинвазивни. Најпознати од инвазивните се боцкањето со игла, електричната стимулација, магнетната терапија и други методи, кои физички навлегуваат во телото или неговото енергетско поле. Неинвазивните методи вклучуваат масажа, акупресура, рефлексологија, ароматерапија, реики, биоенергија, хомеопатија и други методи што влијаат на енергетското поле без да го допираат телото.
Енергетската медицина е многу широка и разновидна област, која опфаќа многу школи, традиции и техники. Некои од најпознатите примери за енергетска медицина се:
Традиционалната кинеска медицина, која се базира на концептот на чи – животна енергија што тече низ меридијаните на телото и може да се регулира преку акупунктура, акупресура, билки, диета и вежбање.
Ајурведа – древна индиска медицина базирана на концептот на доша – три основни енергии што ги одредуваат конституцијата, темпераментот и здравјето на поединецот, и може да се балансираат преку билки, диета, јога, медитација и други практики.
Реики, која претставува јапонска практична техника на лекување базирана на концептот на ки – универзална животна енергија што се пренесува од практичар до примател и промовира релаксација, лекување и хармонија.
Биоенергија – западната техника на лекување базирана на концептот на биоплазма, електромагнетно поле што го опкружува телото и може да се почувствува, види и манипулира со рацете, погледот и умот.
Енергетските терапевти користат различни техники и методи за да влијаат на енергетските полиња и текови во и околу човечкото тело, со цел лекување разни болести, и физички и психолошки, кои се поврзани со нарушување или блокада на енергијата.
Енергетските терапевти тврдат дека се способни да лекуваат депресија, стрес, анксиозност, фобии и други ментални состојби и нарушувања, тумори, хепатитис, цироза, дијабетес, ревматски, автоимуни заболувања и други хронични и тешки болести, кои се предизвикани од акумулација или стагнација на негативна енергија, токсини, воспаленија и инфекции; кардиоваскуларни заболувања, висок и низок крвен притисок, аритмија, проширени вени, тромбоза и други болести поврзани со циркулацијата на крвта и срцевиот ритам, кои се предизвикани од прекин или слабеење на протокот на енергија низ меридијаните и органите; невролошки заболувања, церебрална парализа, епилепсија, тинитус, Паркинсонова болест, Алцхајмерова болест и други болести поврзани со функционирањето на мозокот и нервниот систем, кои се предизвикани од оштетување или нерамнотежа на енергијата во главата и ’рбетот; импотенција, неплодност и мускулни заболувања поврзани со репродуктивниот и мускулниот систем, предизвикани од намалување или блокада на енергијата во долниот дел од телото и гениталиите.
Д-р Драгана Шубаревиќ
(Политика.рс)
