Индискиот премиер Нарендра Моди денеска пристигна во Тјенџин, Кина, првпат во последните седум години, за заедно со рускиот претседател Владимир Путин и лидерите на дваесетина други евроазиски земји, да присуствува на дводневниот самит на Шангајската организација за соработка (ШОС).
– Ние сме посветени на унапредување на нашите односи врз основа на меѓусебно почитување, доверба и разбирање – му рече Моди на Си за време на состанокот, може да се види од видео материјалот објавен на официјалниот профил на индискиот лидер на X.
До билатералната средба доаѓа пет дена откако Вашингтон воведе казнени тарифи од 50 проценти на индиската стока поради купувањата на руска нафта од Индија.
Аналитичарите велат дека Си и Моди сакаат да претстават обединет фронт против западниот притисок.
Моди рече дека е создадена атмосфера на „мир и стабилност“ на нивната спорна хималајска граница, местото на долготраен воен застој по смртоносните судири на војниците во 2020 година што ги замрзна повеќето области на соработка меѓу стратешките ривали со нуклеарно оружје.
Тој додаде дека е постигнат договор меѓу двете земји во врска со управувањето со границите, без да даде детали.
Двајцата лидери имаа значајна средба во Русија минатата година откако постигнаа договор за гранични патроли, предизвикувајќи привремено затоплување на врските што се забрза во последните недели, бидејќи Њу Делхи се обидува да се заштити од обновените закани со царини од Вашингтон.
-Директните летови меѓу двете земји, кои беа суспендирани во 2020 година, „продолжуваат“ – додаде Моди, без да прецизира временска рамка.
Кина овој месец се согласи да ги укине ограничувањата за извоз на ретки минерали, ѓубрива и машини за дупчење тунели за време на клучната посета на кинескиот министер за надворешни работи Ванг Ји на Индија.
-Кина се спротивставува на високите царини на САД за Индија и „ќе застане цврсто на страната на Индија“ – изјави овој месец амбасадорот на Кина во Индија, Сју Феихонг.
Со децении, Вашингтон ги негуваше врските со Њу Делхи со надеж дека тоа ќе дејствува како регионална противтежа на Пекинг.
Во последните месеци, Кина им дозволи на индиските аџии да ги посетуваат будистичките места во Тибет, а двете земји ги укинаа реципрочните ограничувања за туристичките визи.
