СП ЗА СЛЕПИ И СЛАБОВИДНИ ШАХИСТИ
Единствениот македонски претставник и голема шаховска надеж, 16-годишниот Стефан Мелник (1.797 рејтинг-поени, 39-ти пред почетокот на турнирот), на Светското сениорско првенство (СП) за слепи и слабовидни шахисти (ИБЦА), го освои 30-то место, со 4,5 поена од девет можни (три победи, три ремија и три порази), односно ефект од 50 отсто и девет места над почетниот ранг. Притоа Мелник освои и нови 20,4 рејтинг-поени, со играчки перформанс од 1.838 рејтинг-поени, што секако претставува успех.
На СП, кое се играше во полскиот град Жежов, учествуваа вкупно 58 шахисти (еден ВМ, четири ИМ и два КМ) од 22 држави (Индија, Венецуела, Казахстан, Киргистан, Узбекистан, Шведска, Словачка, Италија, Монако и многу други).
Во последното, деветто коло Мелник со црни фигури беше поуспешен од Казахстанецот Александар Жарков (1.686, рангиран, рангиран на 48-то место).
Титулата светски првак ја освои Шпанецот Даниел Едуардо Пулвет Марин (2.483, рангиран втор на почетокот), со седум поени. Второто место му припадна на првиот фаворит и единствен велемајстор (ВМ) на ова СП, Полјакот Марчин Тазбир (2.529, рангиран прв тука), со 6,5 поени, додека трет заврши интернационалниот мајстор (ИМ) од Црна Гора, Предраг Никац (2.241, рангиран петти), исто така со 6,5 поени, но со послаб дополнителен критериум од Тазбир.Г.И.
