Во Македонскиот културно-информативен центар во Софија беше претставен литературниот опус на две македонски поетеси – Елизабета К. Питулкова и Гордана Каракашевска. На средбата на авторките со софиската публика тие ги претставија своите творечки дострели, а преку форма на интерактивност, публиката имаше можност да се вклучи во разговорот.
Елизабета К. Питулкова претставува истакнат глас во современата македонска поезија, со творештво што се одликува со длабока емоционалност, лирска префинетост и егзистенцијална чувствителност. Нејзините стихови се вистински запис на душевни состојби – тивки, често тажни, но секогаш искрени и автентични. Со своето богато поетско дело, учества во културниот живот на Македонија и ја претставува македонската поезија на повеќе меѓународни сцени. Таа е глас на интимата, тишината и внатрешната светлина – поет што со секој нов збор нè повикува да се вратиме кон себеси. Учеството на вакви настани ја потврдува вредноста на нејзиниот поетски израз надвор од границите на Македонија. Тоа сведочи за универзалноста на темите што ги обработува – љубов, тишина, идентитет, емпатија.
Гордана Каракашевска претставува еден од најинтимистичките и симболички ориентирани поетски гласови во современата македонска литература. Низ своето творештво – поезија, раскази и роман – таа изградува еден свет во кој зборот има телесна тежина, а чувството добива топографија. Дејствува под псевдонимот Ана Каракаш, но во нејзиниот стил нема маска: искреноста, емоционалната ранливост и лирскиот порив се присутни во секој ред. Нејзината поезија и прозни дела се карактеризираат со интимност, емотивност и длабока филозофска перспектива. Јазикот на Каракашевска е префинет, лирски, но и длабоко аналитичен. Таа не бега од егзистенцијални прашања, но ги поставува преку слика, преку метафора, преку „чувствена архитектура“.
