Здрава храна
Ако некогаш сте се нашле пред рецепт за торта и сте се запрашале дали треба да користите прашок за печиво, сода бикарбона или и двете, не сте единствени. Правилната комбинација на овие состојки може да биде клучна за сочноста, воздушестата текстура и вкусот на вашите десерти, а разликата може да се почувствува по првиот залак. Печењето торта понекогаш може да изгледа малку како научна авантура – особено кога ќе стигнете до делот од рецептот со прашок за печиво и сода бикарбона. Двете состојки му даваат волумен на тестото, но тие во различни ситуации функционираат на различен начин и често се клучни за успехот на вашиот колач, мафин или торта.
Во рецептите за класични торти, мафини и јогуртни колачи, како што е популарната торта од цреши или мермерна торта, најчесто ќе најдете прашок за печиво. Прашокот за печиво им дава на колачите лесна, воздушеста структура и неутрален вкус, па затоа е идеален за оние што сакаат едноставни, меки десерти, кои брзо се приготвуваат и уште побрзо исчезнуваат од чинијата.
Сода бикарбона е вистинскиот избор кога веќе имате кисела состојка во рецептот, како што се јогурт, павлака, сок од лимон, мед, какао или овошје. Во оваа комбинација, содата бикарбона реагира со киселина и ослободува меурчиња што го прават тестото полабаво и помеко. Така, на пример, таа е незаменлива во медени колачи, банана-леб, американски палачинки или чоколадни колачи со многу какао. Ако нема доволно киселина, колачот може да има непријатен, сапунест вкус – па, затоа е важно да се следи рецептот.
Прашок за печиво изберете за бисквити и колачи без киселина, сода бикарбона за рецепти со јогурт, мед, какао или овошје, а двете користете ги и кога сакате полн волумен и да го задржите вкусот свеж.
Ако сакате да експериментирате, обидете се да додадете прстофат сода бикарбона и прашок за печиво во класичните мафини или палачинки со јогурт – резултатот ќе биде уште помек и посочен залак.
