Ако како тинејџер сте кликнале „да, имам 18“ на неовластени страници, се чини дека оваа практика е веќе застарена. Имено, Гугл објави почеток на тестирање модел за процена на возраста за машинско учење што треба да утврди дали корисникот има под 18 години. Сличен механизам е најавен и на други платформи, како што е Дискорд.
Во објавата на својот официјален блог, Гугл истакна дека моделот, кој се очекува да биде претставен во текот на годинава, има цел да обезбеди „посоодветни искуства за помладите корисници“. Прво ќе биде достапен во САД, а подоцна ќе се прошири и во други земји. Оваа иницијатива доаѓа во време кога технолошките компании чувствуваат зголемен притисок од законодавците да ги направат своите платформи побезбедни за помладите корисници. Минатата година „Мета“ претстави сличен модел на вештачка интелигенција што помага да се процени дали корисникот е малолетник.
Моделот ќе користи машинско учење за да анализира различни податоци поврзани со профилот на корисникот, како што се историјата на пребарување, категоријата на видеа што се гледаат и должината на постоењето на профилот. Тие податоци можат да ѝ помогнат на вештачката интелигенција да ги препознае обидите за лажирање на возраста. Ако моделот погрешно означи профил како малолетен, корисникот ќе може да потврди дека е полнолетен со официјална лична карта, кредитна картичка или самослик. Гугл исто така истражува дополнителни методи за проверка на возраста на корисниците. Слични методи веќе се имплементирани од други компании, на различни пазари, вклучувајќи и во Европа.
Извршниот директор на Јутјуб, Нил Моен, во најавата за приоритетите на компанијата за 2025 година ја спомена алатката заснована на машинско учење, нагласувајќи дека тие ќе продолжат „одговорно да ја користат моќта на вештачката интелигенција за да го подобрат искуството на Јутјуб за сите корисници“. Дополнително, Гугл планира да воведе дополнителни безбедносни мерки за малолетнички профили, како што се филтрирање или замаглување експлицитни резултати од пребарувањето, како и ограничување на гледањето чувствителни реклами и содржини на Јутјуб.
