Техно
Зимата е годишно време кога дури и на оние што не користат струја за греење им се зголемуваат сметките за струја. Причините може да варираат, но факт е дека кога надвор е ладно, поминуваме многу повеќе време во затворени простории и затоа користиме повеќе електрични апарати дома. Дали сите тие апарати и уреди што ги користиме ни се апсолутно неопходни? Или, барем, дали сите треба да бидат вклучени во исто време? Можно е да заштедите многу ако направите само една едноставна работа: исклучете ги од струја!
Една од причините за поголема потрошувачка е таканаречената „фантомска моќ“, односно струјата што ја црпат апаратите и уредите дури и кога се исклучени. Телевизори, компјутери, печатачи, кафемати, па дури и електрични четки за заби – тие се најчестите виновници. За да се намали влијанието на фантомската енергија врз вашите сметки, експертите препорачуваат да ги исклучувате апаратите кога не се во употреба.
Полначите што се оставени приклучени продолжуваат да трошат струја, дури и кога нема поврзан уред со нив, исто како и десктоп-компјутерите, кои се оставени во режим на мирување, наместо целосно исклучени. Такви уреди се и оние што користат светлосни индикатори (светилки) и различни типови дисплеи кога самиот уред е исклучен; безжични телефони и паметни телефони со екрани што го прикажуваат времето или друга содржина дури и кога не се во употреба; медиа-плеери, особено оние што можат самите да скенираат ажурирања во заднина; нови паметни апарати за домаќинство, како што се фрижидери, машини за перење и сушење, микробранови, роботски правосмукалки, конзоли за игри и други уреди што имаат постојано вклучени дисплеи. Според истражувањето на американското Министерство за енергетика, уредите што се исклучени во режим на подготвеност, но сè уште се поврзани на мрежата, сочинуваат помеѓу 5 и 10 проценти од вкупната потрошувачка на електрична енергија во домаќинството.
