ФУДБАЛ
Арсенал е рекордер за голови по корнер во петте најсилни европски првенства
Арсенал го постигна и 23-от гол по изведен корнер од почетокот на минатата сезона и е рекордер во конкуренција на тимовите од петте најсилни европски фудбалски првенства, во Англија, Шпанија, Франција, Германија и во Италија, пишува „Би-би-си“. Тој гол беше постигнат во ремито 1-1 на гости со Фулам, во 15. коло на англиската Премиер-лига, и е уште еден во долгата низа голови постигнати од прекини, изработени од тренерот за игра при прекини Николас Жовер, кој го трансформира тимот во таа област од играта откако му се приклучи на Арсенал од Манчестер сити во 2021 година, пишува „Би-би-си“. Н.М.
АЛПСКО СКИЈАЊЕ – СВЕТСКИ КУП
Тројна победа на скијачите од Швајцарија на трките во САД
Швајцарските скијачи забележаа три победи во три различни дисциплини во Светскиот куп (СК) во алпско скијање викендов во Бивер Крик (САД). Така, Жастин Мурсие победи во спуст, Марко Одермат во супервелеслалом, а Томас Тумлер во велеслалом.
Од нив, Одермат, актуелниот победник во СК и освојувач на малите кристални глобуси за титулите во минатата сезона во спуст, супервелеслалом и во велеслалом, беше и втор во спуст на патеката во Бивер Крик.
По шест трки сезонава во СК во генерален пласман води Хенрик Кристоферсен од Норвешка со 245 бода, а потоа следуваат Клемен Ноел од Франција со 200, Атле Мекграт од Норвешка со 192, Одермат и Лукас Пињеиро Братен од Бразил со по 180 поени…
Сезоната во СК во алпско скијање продолжува викендов, со натпреварите во велеслалом и во слалом во францускиот скијачки центар Вал д`Изер. Н.М.
СКИЈАЧКИ СКОКОВИ – СВЕТСКИ КУП
Продолжи доминацијата на Пашке
Пиус Пашке (Германија) ја оствари третата победа во Светскиот куп (СК) сезонава во скијачки скокови, по доминантниот настап во Висла (Полска), и остана лидер во СК, а ја има и својата најдобра сезона во СК досега. Второто место го освоија Австријците Јан Херл и актуелниот победник на Светскиот куп, Стефан Крафт.
Пашке, кој досега на шесте натпревара сезонава оствари три победи и по едно второ и трето место, води со 476 бода, пред тројца натпреварувачи од Австрија, Даниел Чофенинг со 380, Херл со 366 и Крафт со 336 бода. Сезоната на СК во скијачки скокови продолжува викендов во Титизе-Нојштад (Германија). Н.М.
