Двајца Бугари во Велика Британија се изјаснија за виновни за шпионирање во корист на Русија. Орлин Русев (46) од Грејт Јармут и Бисер Џамбазов (43) од Лондон, признале дека учествувале во шпионски заговор.
Ова стана јасно на почетокот на случајот против уште тројца Бугари кои се обвинети дека се дел од истата шпионска мрежа. Така, во Велика Британија продолжува случајот против Катрин Иванова (33), Вања Габерова (30) и Тихомир Иванчев (39 ), кои досега ја негираа вината и се изјаснија дека се невини. Иванова се изјасни за невина и по обвинението за поседување лажни лични документи.
-Помеѓу 2020 и 2023 година, овие обвинети, заедно со голем број други лица, шпионирале за Русија. Сите знаеле зошто им било наредено да ги извршуваат своите операции. Нивните активности биле преземени директно и индиректно во корист на Русија – рече обвинителката Алисон Морган.
Обвинителството тврдеше дека групата вршела надзор, користела лажни идентитети и висока технологија, а исто така изготвила детални извештаи во замена за значителни суми пари.
