Медицински совет
Хернијацијата на лумбалниот диск е честа лезија во долниот дел на грбот што предизвикува ишијас – болка што зрачи од долниот дел на ’рбетот преку задникот, задниот дел на бутот и до стапалото. Оваа болка е резултат на иритација на нервот, кој е компресиран од хернијата, особено како резултат на воспаление. Овие хернии се чести, особено кај постарите луѓе, и предизвикуваат симптоми само кога иритираат нерв. Каде да го барате виновникот за оваа болест? Една нова студија доаѓа до изненадувачки заклучоци. Таа идентификуваше 41 ген поврзани со хернијација на лумбалниот диск, водечка причина за ишијас. Претходните истражувања идентификуваа 23 региони на геномот што се поврзани со наследните фактори на ризик за хернијација на лумбалниот диск.
Во моментов, меѓународен тим научници од Универзитетот во Оулу (Финска) ги анализираа генетските и здравствените податоци на 829.699 луѓе од финската, британската и естонската биобанка „ФинГен“. Откриени се 41 нов регион од геномот што влијаат на структурата на дискот и воспалителните фактори, што може да го зголеми ризикот од хернијација на дискот. Дополнително, откриени се нови врски на гените со нервниот систем и нервната функција, што може да влијае на перцепцијата на болката и нејзиното времетраење. Анализата вклучува и пациенти на кои им е потребна операција. Беа идентификувани пет нови региони на геномот поврзани со потешки случаи, кои бараат хируршка интервенција.
– Овој тип анализа беше возможен благодарение на многу добрите и обемни фински здравствени регистри, кои ни овозможуваат сеопфатно да ги проучуваме механизмите на болеста – нагласи д-р Вил Сало од Универзитетот во Оулу, водечки аналитичар на студијата.
Како што нагласуваат авторите, студијата произвела и многу резултати што можат да се користат во идните истражувања.
– Се надеваме дека нашите наоди и збирки на податоци ќе се користат за развој на медицински и превентивни решенија во иднина. Ова, на пример, би можело да отвори можности за развој на третмани за болка за пациентите со хернија на дискот што страдаат од зрачна болка и на тој начин да го подобри нивниот квалитет на животот – потенцираа тие.
