Приказната за Американката која доброволно го заврши својот живот во капсула во шумите во Швајцарија пред два месеци го обиколи светот, а сега има сосема нов пресврт. „Достоинственото самоубиство“, како што креаторите ја нарекоа капсулата на смртта, се случи брзо и нечувствително, со вдишување на испуштениот азот. Барем така тврдеа.
Меѓутоа, еден од водечките луѓе на компанијата која го изврши споменатото дело сега е во затвор и се чини дека сè не испадна точно како што беше првично опишано.
Однадвор, затворот во Шафхаузен, на границата меѓу Швајцарија и Германија, повеќе личи на хотел на Алпите. Меѓутоа, околу четириесетина затвореници, главно во притвор, поминуваат 23 часа дневно во самица само со кревет, мијалник и тоалет. Меѓу нив е и Флоријан Вилет, кој штотуку ја започна шестата недела во притвор. Неговата приказна, која предизвика контроверзии и пред неговото апсење поради неговото „потпомогнато самоубиство“, забрзано се развива, а на неговата адреса дури пристигнуваат нови обвинувања.
Овој 47-годишник е еден од претседателите на организацијата „The Last Resort“, која управува со контроверзната „футуристичка капсула“, позната како Сарко (кратенка од „саркофаг“).
Во септември во капсулата почина првата жена, осомничено е насилно убиство
На 23 септември, во шума на околу осум километри од затворот, жена, 64-годишна мајка на две деца, стана првата личност која го завршила својот живот во оваа капсула, сето тоа со само едно притискање на копче, по што се ослободува азот, а кислородот исчезнува. Нејзината смрт, според Вилет, била „мирна, брза и достоинствена“ и сè поминало „како што било планирано“.
Сепак, тој би можел да биде во голема неволја доколку се покаже дека ја убил жената со својата директна „помош“ – не со притискање на копче, туку со давење со голи раце. Имено, се чека јавен одговор на прашањето – дали форензичарите при вадењето на телото од капсулата и обдукцијата откриле траги од задушување на вратот на жената.
Обвинението, кое наводно го изнесе јавниот обвинител на суд, неделава стана наслов во швајцарскиот печат.
Јавниот обвинител, кој наводно го подгреал сомнежот за „убиство со умисла“ со цел да го продолжи притворот на Вилет, одби да ги потврди или негира овие извештаи, кои организацијата „The Last Resort“ ги нарече „смешни и апсурдни“.
Сепак, оваа ситуација, заедно со дополнителните детали за последните моменти на жената, придонесе за растечката полемика околу капсулата „Сарко“.
Следствено, холандскиот дневен весник „Де Фолкскрант“ доби ексклузивен увид во последните моменти на Американката, а во текстот се наведува дека за време на судското рочиште, главниот обвинител Питер Штихер ја покренал можноста жената да била насилно задавена, а сето тоа врз основа на извештајот поднесен од судските вештаци, во кој се опишани нејзините повреди на вратот.
Организацијата „The Last Resort“, пак, за швајцарските медиуми изјавила дека жената боледува од остеомиелитис, инфекција на коските која можела да предизвика траги на вратот.
