Како дел од проектот „Версополис“ денес беа претставени поетите Петер Завада од Унгарија и Ѓокченур Челебиоглу од Турција.
Петер Завада е унгарски поет, драматург и универзитетски професор од Будимпешта. Завада бил дел од успешната рап група Akkezdet Phiai (Започнете со Фиаи). Досега има објавено пет поетски збирки во соработка со издавачките куќи Libri и Jelenkor. Покрај другите негови достигнувања, тој е добитник на стипендијата за драматургија „Иштван Еркењ“ во 2016 година, книжевната стипендија „Петер Хорват“ во 2017 година и наградата за млади филозофи „Когито“ во 2023 година. Тој е постар предавач на Универзитетот „Лоранд Етвеш“, на Одделот за естетика. Неговите драми биле поставени во најголемите театри низ Будимпешта, Словачка и Германија.
Ѓокченур Челебиоглу е поет, преведувач, уредник и поетски активист од Истанбул.
Како поет има објавено седум поетски збирки на турски јазик во Турција. Добитник е на престижни награди како што се наградата за најдобра дебитантска поетска збирка „Аркадаш З“, „Озгер“ за неговата прва книга, наградата за книжевност „Сабахатин Кудрет Аксал“, како и поетската награда „Метин Алтиок“ за неговата најнова книга. Неговите книги со избрани песни се објавени на англиски, германски, италијански, српски, романски и бугарски јазик.
Тој е коуредник на турскиот дел на порталот „Poetry International“ (Меѓународна поезија), како и дел на уредничкиот одбор на македонското меѓународно книжевно списание „Блесок“. Уредник е на познатото списание за книжевност „Офлајн“ од Истанбул. Уредил голем број книжевни списанија, поезија и поетски преводи на турски јазик.
Како преведувач, на турски јазик има преведено и објавено голем број книги поезија од разни автори како: Игор Исаковски, Валас Стивенс, Пол Остер, Урсула ле Гвин, Оушан Вуонг, Ен Карсон и многу други неверојатни светски поети, а на англиски јазик ги превел некои од најдобрите турски поети.
Како поетски активист, тој бил учесник и/или организатор на работилници за превод на поезија и поетски фестивали во многу земји. Тој е куратор и кодиректор на Word Express („Зборовно искажување“); кодиректор на поетските фестивали „Офлајн Истанбул“, „Поезиум Истанбул“, „Мозаик на метафори“ од Газијантеп, како и на „Турско-американски денови“. Бил член на одборот за меѓународниот поетски фестивал Nilüfer („Лотус“), член на меѓународниот поетски фестивал во Крит, како и меѓународното поетско движење Kritya („Акција“).
„Версополис“ е европски поетски проект на реномирани книжевни фестивали, кој ја изложува, поврзува и приближува најдобрата поезија кон различна публика и преку соработка ивзаемно збогатување, додава вредност и одржлива визија кон првичната европска идеја.
