Рускиот претседател Владимир Путин, на конференција за вештачката интелигенција (АИ) во Москва, најави дека наскоро Русија ќе почне да развива напредна верзија за развој на вештачката интелигенција.
Путин смета дека е невозможно да се забрани АИ и предупреди дека би било опасно и неприфатливо да им се овозможи на западните технологии да развијат монопол во таа технологија, објави новинската агенција Ројтерс.
„Како прв чекор во блиска иднина ќе биде потпишан претседателски указ и ќе се усвои нова верзија на националната стратегија за развој на вештачката интелигенција. Таа стратегија ќе донесе значителни промени, вклучувајќи експанзија на фундаменталните и применети истражувања во областа на генеративната вештачка интелигенција и големите јазични модели“, рече Путин.
Русија, како што нагласи Путин, треба да направи законодавни и инвестициски промени за да го поттикне развојот на вештачката интелигенција.
САД и Кина предводат во развојот на вештачката интелигенција, технологија за која многу научници предвидуваат дека ќе го трансформира светот и ќе го револуционизира општеството, како што тоа го направија компјутерите на крајот на 20 век. И Москва има амбиции да стане суперсила во вештачката интелигенција, но нејзините резултати засега доцнат поради војната во Украина, која натера голем број талентирани научници да ја напуштат Русија, а Западот воведе санкции против Москва кои го сопреа увозот на високотехнолошки производи, пишува Ројтерс.
