Научна студија
Неодамнешните наоди објавени во списанието „Девелопментал когнитив неуросајенс“ открија дека разновидноста на микробите во цревата не само што може да влијае на нашата физичка подготвеност туку и на тоа колку брзо старееме.
– Наодите на тимот од Унгарскиот универзитет за спортски науки отвораат нови можности за искористување на моќта на пробиотиците за промовирање на здравјето и долговечноста – рече професорот Золт Радак, кој е водечки автор на студијата.
Радак и неговиот тим во Будимпешта ја испитаа врската помеѓу разновидноста на цревниот микробиом, биолошката возраст, нашата возраст одредена од состојбата на нашето целокупно здравје, а не годините на живот, и физичката подготвеност на 80 аматери веслачи.
Неочекувани резултати
За целите на студијата, секој учесник беше подложен на низа процени за способност и обезбеди примерок од столицата за анализа на цревните бактерии, како и примероци од крв за да се утврди неговата биолошка старост со помош на епигенетски маркери. Епигенетските маркери се како прекинувачи во нашата ДНК, кои можат да контролираат дали одредени гени се вклучени или исклучени и играат клучна улога во одредувањето како нашите клетки се развиваат, функционираат и реагираат на нашата околина.
На квалитетот на нашите клетки може да влијаат фактори како што се начинот на живот, исхраната и изложеноста на факторите на околината, кои на крајот може да влијаат на нашето здравје и на начинот на кој старееме. Епигенетските маркери им овозможуваат на научниците да го измерат овој клеточен пад, обезбедувајќи слика од нашите „епигенетски часовници“ или „биолошка возраст“.
– Откривме дека воспалителните бактерии, всушност, го забрзуваат процесот на стареење, па ако имате повеќе воспалителни бактерии, тогаш имате напредно стареење – изјави Радак за „Еуроњус“, додавајќи дека забрзаното стареење значи дека сте постари од вашата хронолошка возраст.
Исто така, по анализата на специфичните бактерии присутни во цревните микробиоми на веслачите, истражувачите открија дека повисоките нивоа на антиинфламаторни бактерии се поврзани со подобрени индикатори за кондиција и побавна стапка на стареење. Спротивно на тоа, присуството на воспалителни бактерии беше поврзано со послаби перформанси во тестовите за кондиција.
Студијата, сепак, не утврди причина и последица
Спортистите беа на возраст меѓу 38 и 84 години и учествуваа на Светската мастерс веслачка регата во 2019 година, меѓународен натпревар во веслање специјално дизајниран за мајстори веслачи.
Клучната врска помеѓу цревата и стареењето
– Наодите укажуваат на клучната врска помеѓу бактериите во цревата, воспалението, кондицијата и процесот на стареење, предизвикувајќи ја вообичаената претпоставка дека повеќе бактерии едноставно значи подобро здравје – вели Радак.
Студијата, меѓутоа, не утврди причина и последица. Многу е можно веројатно поздравиот избор на храна на спортистите да има позитивен ефект врз изобилството корисни бактерии во нивните црева.
– Овие бактерии не се поврзани со хронолошкото стареење. Што мислам дека е мошне интересна опсервација бидејќи тоа значи дека овие бактерии, всушност, се вклучени во стареењето со метилација на ДНК – рече Радак.
Со други зборови, воспалителните бактерии, кога се во изобилство, се поврзани со забрзано стареење.
– Мислам дека овие откритија се важни затоа што прво треба да ги идентификуваме врските. А потоа, се разбира, ако можеме да го потврдиме тоа, следниот чекор е да го измениме овој вид на изобилство на воспалителни бактерии и потоа да направиме модификации во микробиомот на цревата што овозможува, можеби, забавување на стареењето и поздрав живот – рече тој.
Тимот на Радак моментално спроведува последователна шестмесечна студија, во која го промени цревниот микробиом на веслачите што користат пробиотици за да проценат дали оваа интервенција директно влијае на биолошката возраст.
Наодите се очекува да бидат објавени на почетокот на 2024 година. Во меѓувреме, тие работат и на друга студија во која учествуваат 60 олимписки победници на возраст од 25 до 102 години, чија цел е да го истражи влијанието на раната физичка активност на високото ниво врз процесот на стареење. Прелиминарните резултати веќе открија дека елитните спортисти имаат помлада епигенетска возраст од нивната хронолошка возраст.
