Парадоксален е фактот што во контекст на подготовките на германското воено воздухопловство за евентуална воена употреба на нуклеарно оружје (кое е веќе распоредено на германска територија), германската влада истовремено, среде енергетската и финансиската криза, ги затвора своите (само три преостанати) нуклеарни централи
Германски парадокси
Германија, чувствителна на еколошките прашања, која затвори серија свои нуклеарни централи, најави дека за време на големи воздушни вежби со НАТО-сојузниците, наречени „Ер дефендер 2023“, нејзините бази ќе бидат домаќини на борбени авиони „Ф-35“ на Алијансата, какви што треба да ѝ бидат испорачани во 2027 година, со примарна цел да носат и да користат нуклеарни бомби складирани на германска територија.
Германските воени претставници со своите сојузници од НАТО ги договараат последните детали за големата воздухопловна воена вежба „Ер дефендер 2023“, која ќе се одржи во Европа од 12 до 22 јуни. Во тој контекст и официјално е најавено дека за време на вежбата ќе се случи „најголемото движење на американски борбени авиони кон Европа во последните неколку децении“.
Американците ќе испратат 100 борбени авиони со седиште во САД во Европа за вежбата, вклучувајќи „Ф-35 лајтнинг 2“, „Ф-15Ц“, борбени авиони „Ф-16“ и „А-10 тандер болд 2“ авиони за напад, како и авиони за полнење гориво за време на летање „KC-46 пегаз“. Според најавите, тоа ќе биде најголемиот трансатлантски борбен воздушен пренос од Студената војна до денес. Целта е да се демонстрира способноста на американската воздушна Национална гарда брзо да распореди воздушни сили низ Европа во случај на воена акција на НАТО.
Финска како нова членка на НАТО за првпат ќе учествува на вежбите
Во подготовките за вежбата директно учествува командантот на германските воздухопловни сили (Inspekteur der Luftwaffe), генералот Инго Герхарц. На вежбите ќе учествуваат 60 борбени авиони на германското воено воздухопловство, а другите членки на НАТО ќе испратат уште 60 борбени авиони, така што на „Ер дефендер 2023“ ќе учествуваат вкупно 220 борбени авиони на НАТО.
Финска како нова членка на НАТО за првпат ќе учествува на вежбите. Бидејќи сè уште не ги добила нарачаните американски борбени авиони „Ф-35 лајтнинг 2“ од петтата генерација, на вежбата ќе ги испрати своите борбени авиони „Ф/A-18 супер хорнет“.
За време на вежбата, американскиот „Ф-35“ ќе биде сместен во базата Спангдалем во Германија. Тоа ќе биде можност германскиот авијациски персонал, вклучувајќи и пилоти и техничари, да се запознае со борбениот авион што ќе биде испорачан во Германија наместо борбените авиони „панавиа торнадо“. Минатата година Германија нарача од САД 35 борбени авиони „Ф-35“ во вредност од 8,3 милијарди евра. Се проценува дека вкупната цена ќе биде околу 10 милијарди евра. Германија планира да го воведе „Ф-35“ во употреба од 2027 година. Примарната задача на авионите „Ф-35“ во германскиот арсенал ќе биде во случај на војна да носат и да користат американски нуклеарни бомби што се распоредени во германските бази.
Во коалицискиот договор од 24 ноември 2021 година, врз основа на кој беше формирано владејачкото мнозинство и беше формирана влада, Зелените се согласија германското учество во нуклеарниот аранжман на НАТО да остане во сила и во иднина. Згора на тоа, Зелените силно ја поддржаа агендата за зајакнување и реконструкција на германските вооружени сили и нуклеарниот потенцијал отстапен од САД преку модернизацијата на нуклеарното оружје распоредено во Германија и стекнувањето нови борбени авиони за германското воздухопловство.
Американски е кодираниот сигнал за „отклучување“ на нуклеарните бомби
Одлуката на германската влада да продолжи да учествува во нуклеарното одвраќање на НАТО наиде на одобрение од Вашингтон, НАТО и од Европската Унија, бидејќи ја потврди определбата на Германија активно да учествува „во подготовките за систематски натпревар со авторитарни држави“.
– Добрата вест е што остануваме на истиот курс – рече Кристијан Молинг, геополитички аналитичар во Германскиот совет за надворешни односи (ДГАП), аналитички центар со седиште во Берлин. Со тоа тој ги отфрли претходните стравувања на сојузниците дека Германија може да се откаже од клучните начела на нејзината надворешнополитичка доктрина, вклучувајќи го и учеството во нуклеарно одвраќање од страна на НАТО, особено по заминувањето на канцеларката Ангела Меркел.
Се проценува дека 15-20 такви нуклеарни бомби се складирани на германска територија во воздухопловната база Бухел во близината на границата со Луксембург, во подземни засолништа способни да складираат вкупно 44 американски нуклеарни бомби од типот Б61. Станува збор за класични гравитациски бомби, чија испорака до цели и употреба му беа доверени на германското воздухопловство. Нуклеарните бомби се сопственост на американската војска и се строго чувани од американски војници. Како и со целото американско нуклеарно оружје, овластувањето за употреба во случај на војна ќе го даде американската администрација, односно американскиот претседател. Тој испраќа кодиран сигнал за отклучување на нуклеарните боеви глави на американското стратегиско, оперативно и тактичко нуклеарно оружје. Во случај на таков развој на настаните, американскиот персонал во базата Бухел, по добивањето на сигналот, би добил одредена комбинација на шифри, а откако ќе ги споредат со сопствените тајни шифри и ќе извршат криптографска процедура, ќе ја добијат конечната шифра за „отклучување“ на нуклеарните бомби. Потоа, бомбите ќе бидат обучени за употреба и ќе му бидат предадени на германското воздухопловство. Бомбите би биле преземени од единицата на Тактичката ескадрила на воздухопловните сили 33 (ТактЛвГ 33) на германските воздухопловни сили (Луфтвафе).
За време на Студената војна целта беше СССР, а денес Русија
До реорганизацијата на Луфтвафе во октомври 2013 година, таа беше наречена Борбено-бомбардерска ескадрила 33 (ЈаБоГ 33). Формацијата располага со 45 борбени авиони „панавиа торнадо ИДС“, обучени да носат и да користат американски нуклеарни бомби Б61.
По започнувањето на борбените мисии, германските авиони со екстремно низок лет ќе летаат во противничкиот воздушен простор, за што е подготвен авионот „торнадо“, во камикаѕе стил и ќе фрлаат бомби на одбрани цели. За време на Студената војна целта беше СССР, а денес е Русија. Единствениот начин да се користат американските гравитациски бомби Б61 во напад на цели заштитени од руската противвоздушна одбрана е токму пробивањето во одбраната област со екстремно низок лет. Тогаш се намалува можноста за забележување противвоздушна одбрана и соборување на леталото. На овој начин германските борбени авиони треба да навлезат длабоко во воздушниот простор на непријателот. Употребата на борбените авиони „Ф-35“ за овие мисии, благодарение на нивните стелт-карактеристики, треба да ги умножи нивната ефикасност и опстанокот во услови на претпоставената силна руска противвоздушна одбрана.
Дополнително, модернизацијата на бомбите Б61 според стандардот Б61-12 ќе овозможи поголема прецизност во гаѓањето цели и дополнително ќе го зголеми опстанокот на авионите што ги користат во борба. Имено, со модернизацијата се поставуваат современи системи за самоводење, кои ќе овозможат тие класични гравитациски бомби без напојување да се фрлаат од далечина од 30 километри од целта, а веројатноста за удар би била во круг со пречник од 10 метри. По ослободувањето од леталото, бомбата во почетната фаза би била насочена кон целта со помош на инертен систем за наведување, односно однапред одредена патека, а во завршна фаза би користела усовршен ГПС-приемник што прецизно би ја водел до целта. За разлика од оружјата што користат ласерски или ИР-системи за водење, ГПС-системот не зависи од временските услови како магла или дожд што ја намалуваат ефикасноста на ласерските и ИР-системите. Поради нивната висока прецизност, подобрените бомби Б61 ќе имаат способност да уништат добро заштитени и длабоко вградени непријателски цели, како што се командни пунктови на поголеми единици или логистички центри, кои се доволно исплатливи за употреба на нуклеарно оружје.
Издувните гасови и оружјето што го носат имаат сертификат за поволно влијание врз животната средина?!
Воздухопловниот полк „ТактЛвГ 33“ на германските воздухопловни сили или порано „ЈаБоГ 33“ има авиони што се способни за длабока пенетрација во непријателската територија од своето основање. Од своето основање во 1956 година, единицата користи американски борбени авиони „рипаблик Ф-84F тандрхандр“, од летото 1962 година се префрли на американски авиони „Ф-104 старфајтер“, а од мај 1985 година го воведе европскиот „панавиа торнадо ИДС“ во неговото вооружување.
Парадоксален е фактот што во контекст на подготовките на германското воено воздухопловство за евентуална воена употреба на нуклеарно оружје веќе распоредено на германска територија, германската влада истовремено, среде енергетската и финансиската криза, ги затвора своите само три преостанати нуклеарни електроцентрали. Уште еден пример за тоа како воената технологија, вклучувајќи ја и нуклеарната технологија, е тивко заобиколена од големата зелена трансформација на економијата и општеството и уште една потврда дека Новиот зелен договор, всушност, е наменет исклучиво за граѓаните. Додека нивните автомобили го мерат ослободувањето на ЦO2 во атмосферата, воздушниот простор на зелената Европска Унија е преполн со борбени авиони, од кои некои се дизајнирани да користат нуклеарно оружје. Нивните издувни гасови и оружјето што го носат очигледно имаат сертификат за поволно влијание врз животната средина, се тврди во анализата на „Геополитика“.
Подготвил: Mарјан Велевски
