Мустафа Авџи (30), кој беше извлечен од под урнатините во турската провинција Хатај дури 261 час по земјотресот, в болница доби посета од сопругата и ќерката која е родена ноќта кога се случи разорниот земјотрес.
– Среќен сум. Се чувствувам како да сум се преродил – рекол Авџи во болница, пренесува „Си-ен-ен Турк“.
Авџи кој е сместен во приватна болница во Антакија, на новинарите им рекол дека мислел дека членовите на неговото семејство не го преживеале земјотресот.
Неговата сопруга Билге објаснила дека се породила три часа по земјотресот. Таа истакна дека Мустафа само неколку минути пред земјотресот отишол во мензата на болницата за да купи храна, додека таа во исто време ја напуштила болницата со бебето во раце, со помош на присутните.
Мустафа денеска, откако беше извлечен од урнатините на болницата, најпрвин сакаше телефонски да разговара со својот брат, за да дознае како се членовите на неговото семејство. Покрај него, од урнатините на истата болница е спасен и 26-годишниот Мехмет Али Шакироглу.
Двајцата спасени мажи ги посети и турскиот министер за здравство, Фахретин Коџа, кој им посака брзо закрепнување.
– Се надевам дека мојот народ повеќе нема да доживее слични катастрофи. Знаеме дека ќе ги надминеме сите тешкотии додека сме заедно. Во тоа нема сомнеж – рече министерот.
Спасен маж кој поминал 278 часа под урнатини
Спасувачките екипи денеска од под урнатините го извлекоа 45-годишниот Хакан Јасиноглу кој помина 278 часа под урнатините од разорните земјотреси со јачина од 7,7 и 7,6 степени според Рихтеровата скала, што во понеделникот на 6 февруари ги погодија јужните делови на Турција, јавува „Анадолу“.
Спасувачите го предале Јашиноглу на медицинските екипи, кои му укажале прва помош и го пренеле во болница.
Бројни спасувачки тимови се уште упорно трагаат по луѓето затрупани во урнатините на зградите по земјотресот во кој загинаа најмалку 42.000 луѓе на југот на Турција и во пограничните области на Сирија.
