Експлозија го потресе јужниот албански приморски град Саранда, при што целосно е уништен хотел, а оштетени се и најмалку 20 други деловни објекти.
– Саранда денеска се разбуди од звукот на силна експлозија во хотел, која предизвика паника кај граѓаните, додека експлозивот целосно го уништи трикатниот објектот. Пет килограми тритол бил поставен на влезот од хотелот, сопственост на Спиро Чабири, кој се наоѓа на градскиот булевар, додека од експлозијата се оштетени и околните згради. За среќа нема информации за повредени – јавија албанските медиуми.
Според полицијата сопственикот на хотелот „Визант“ кој работел само во летната сезона, додека сега бил затворен, имал недоразбирања со поранешниот косопственик, со кого биле во судски процес, како околу хотелот „Визант“ така и за пицеријата сместена на првиот кат.
– Од 2002 година двајцата косопственици Спиро Чабири и Димитар Еванѓелиу се во судски процес за сопственоста на овој хотел. Не е познато дали експлозијата, што се случи во 5.52 часот е поврзана со овие конфликти, но службите целосно се ангажирани во утврдување на мотивите и откривање на сторителот – стои во полициското соопштение.
Медиумите наведуваат дека експлозијата се слушнала во целиот град, а жителите тврдат дека предизвикала потреси слични на земјотрес.
