Соединетите Американски Држави, Јапонија и Јужна Кореја денеска предупредија дека севернокорејската нуклеарна проба ќе наиде на „невиден силен одговор“, ветувајќи единство по лансирањето на ракетата од Пјонгјанг.
По разговорите во Токио, замениците министри за надворешни работи на трите земји рекоа дека ќе го засилат своето одвраќање во регионот.
– Се договоривме дополнително да ја зајакнеме соработката… за да може Северна Кореја веднаш да ги прекине своите незаконски активности и да се врати на разговорите за денуклеаризација. Трите земји се согласија околу потребата од невидено силен одговор доколку Северна Кореја продолжи со седмиот нуклеарен тест – рече заменик-шефот на дипломатијата на Јужна Кореја, Чо Хјун-донг.
Сеул и Вашингтон постојано предупредуваа дека Пјонгјанг би можел да биде блиску до тестирање нуклеарна бомба за првпат од 2017 година, по серијата лансирања на балистички ракети.
Еден проектил ја прелета Јапонија минатиот месец, а Северна Кореја соопшти дека спровела тактички нуклеарни вежби.
– Сето ова однесување е непромислено и длабоко дестабилизирачко – рече американскиот заменик државен секретар Венди Шерман, повикувајќи ја Северна Кореја „да се воздржи од дополнителни провокации“.
Минатиот месец, севернокорејскиот лидер Ким Јонг-ун ја прогласи земјата за „неповратна“ нуклеарна сила, со што практично завршија преговорите за нејзините забранети програми за оружје.
