Истражниот комитет на Русија соопшти дека убиството на Дарја Дугина, ќерка на познатиот руски идеолог Александар Дугин, која загина во Москва кога во нејзиното возило се активирала експлозивна направа, било планирано и нарачано.
Податоците добиени во истрагата покажуваат дека злосторството во кое загина Дарја Дугина било претходно планирано и нарачано, соопшти Истражниот комитет на Русија, пренесе РТС.
Утврдено е дека експлозивната направа била поставена под автомобилот, под возачкото седиште.
– На самото место починала Дарја Дугина, која била зад воланот – се додава во соопштението.
Во моментов, истражителите, со учество на експерти од Главната управа за судска медицина на Рускиот истражен комитет, ја продолжуваат истрагата.
Портпаролката на Министерството за надворешни работи на Русија, Марија Захарова, коментирајќи го настанот, рече дека ги чека резултатите од истрагата.
– Доколку се потврди украинската трага – а оваа верзија ја изнесе лидерот на ДНР Денис Пушилин, и мора да се провери од надлежните органи – тогаш треба да зборуваме за политика на државен тероризам што ја спроведува режимот во Киев – напиша Захарова на нејзиниот канал на Телеграм.
Таа посочи дека во последните години се акумулирани многу факти кои зборуваат во прилог на тоа – од политички повици за насилство до учество на украинските државни структури во злосторства.
Дарја Дугина е родена во 1992 година, дипломирала на Филозофскиот факултет на Московскиот државен универзитет „Ломоносов“ и работела во Меѓународното евроазиско движење, предводено од нејзиниот татко.
Александар Дугин е истакнат ултранационалистички идеолог за кој се верува дека е близок со рускиот претседател Владимир Путин. Според рускиот медиум 112, Дугин и неговата ќерка синоќа требало да се вратат од настан во ист автомобил, но Дугин во последен момент влегол во друг автомобил.
Иако нема официјална позиција во руската влада, се верува дека Дугин е близок сојузник на Путин, па дури и го нарекуваат „Распутин на Путин“. Неговата ќерка Дарја Дугина беше новинарка која се залагаше за руската инвазија на Украина.
Претходно годинава, таа беше ставена на списокот на санкционирани лица од страна на американските и британските власти, кои ја обвинија 30-годишната девојка дека придонесува за онлајн „дезинформации“ за руската инвазија. Во мај, таа ја опиша војната како „судир на цивилизации“ и изрази гордост што и таа и нејзиниот татко беа санкционирани од Западот.
Во 2015 година, САД го санкционираа Александар Дугин за неговата наводна вмешаност во руската анексија на Крим. Неговите дела се заслужни за длабоко влијание врз светогледот на Владимир Путин и тој се смета за главен интелектуален архитект на ултранационалистичката идеологија на која многумина во Кремљ се придружуваат. Дугин со години ја повикуваше Москва да се наметне поагресивно на глобалната сцена и ја поддржуваше руската воена инвазија во Украина.
