Разговаравме со директорот на Управата за водење матични книги (УВМК), нешто договоривме и формиравме работна група која работи на надминување на проблемот и верувам дека ќе имаме резултати на тој план, информира министерот за правда Никола Тупанчески на денешната прес-конференција одговарајќи на прашање поврзано со штрајкот на Управата за водење на матични книги.
Министерот појасни дека уште првиот ден кога тие дошле пред Министерството за правда, ги примиле заедно со директорот и со сите заинтересирани страни за да поразговараат околу штрајкот.
– Првично од формално правен апсект, работата не е во полза на Управата за водење матични книги. Треба да се потпише колективен договор, а нивното барање е надвор од законскиот пропис, односно надвор од Законот за јавна администрација, како формална пречка – рече Тупанчески.
Тој вели оти успеале да договорат неколку работи како супститут што би можеле да им го заменат нивното барање, да добијат некакви погодности, на пример унапредување во службата, некакви додатоци…
– Треба да се биде внимателен да не се излезе од законската рамка од една страна, а од друга страна да се излезе во пресрет на барањата на штрајкувачите. Голем дел од претставниците на Управата, последна проценка на директорот е дека една петтина, или 20 до 25 посто од нив не работат. Со тоа што, да не заборавиме дека и кога е штрајк треба да се штрајкува во просториите каде се работи и имаме сознанија дека дел од нив воопшто не се појавуваат на работа, тоа треба комплексно да се разгледа – вели Тупанчески.
Управата, посочи тој, порано беше сегмент од МВР, а потоа е дел до Министерството за правда.
– Може да разговараме за моделот, треба да им се најде, заради спецификата на работата, вистинското место, дали тоа е Министерството за правда е прашање за кое и јас барам одговор. Може да се разговара за евентуално реалоцирање каде што би можело да биде поприродно нивното место и нивната улога – рече Тупанчески.
Независниот синдикат на Управата за матични книги го започна генералниот штрајк на 27-ми минатиот месец. Независниот синдикат бара колективен договор на ниво на работодавач, линерано покачување на платите и унапредување на работните позиции.
Почнува процесот за подготовка на нов Изборен законик
Во текот на оваа и идната недела ќе го започнеме процесот на подготовка за донесување на нов Изборен законик, информира денеска на прес-конференција министерот за правда Никола Тупанчески.
Како што појасни Тупанчески, тоа значи дека ова е консеквенција на тоа што се случуваше во 2015 година, кога беше формирана меѓуресорска работна група и која во 2016 година започна со активностите, а последните ги имаше во април 2021 година.
– Идејата е од Министерството за правда иницијално да тргне процесот за подготовка на нов Изборен законик, кој би значел вградување на сите препораки од меѓународниот фактор, пред се од ОДИХР/ОБСЕ, меѓутоа и забелешките од другите засегнати страни, посочи Тупанчески.
Во текот на оваа недела, информира тој, до сите засегнати страни ќе биде испратен допис во кој ќе бидат поканети пред се политичките партии, да земат учество во подготовката на Изборниот законик. Тој најави дека ќе бидат поканети и другите засегнати страни, односно невладините организации, здруженија и сите кои на некој начин се поврзани со изборната проблематика.
Според Тупанчески, Изборниот законик претставува еден од основните претпоставки за едно демократско општество и Министерството за правда треба да биде максимално транспарентно и инклузивно и да ги имплементира забелешките кои беа споменати при спроведувањето на последните предвремени парламентарни избори.
– Сакаме процесот да биде транспарентен и инклузивен зашто се работи за хиперсензитивна материја која може да има широк појас на консеквенции во однос на она што се нарекува имплементирање на демократијата во најширока смисла на зборот. Едно од посебните укажувања на меѓународниот фактор беше дека најдобро ќе биде Изборниот законик да биде донесен најмалку шест месеци пред изборите, затоа што тоа се правила на игра кои треба да се почитуваат. Предуслов е и вториот сегмент, а тоа е да се почитува начелото на консензуалност – појасни Тупанчески.
Во таа насока, додаде министерот, покрај транспарентност Министерството ќе се обиде и максимално професионално да го спроведе процесот на подготовка на новиот Изборен законик, односно, покрај претставници на заинтересирани страни ќе вклучат се што ќе биде од полза за донесување најдобар можен Изборен законик.
Одговарајќи на новинарско прашање, Тупанчески посочи дека последните измени на Изборниот законик се направени во април 2021 година и тие се однесуваа на биометриската идентификација. Последните избори, според министерот, покажаа и детектираа низа аномалии кои треба да се исправат и врз основа на компаративна анализа да бидат донесени најдобрите решенија.
– Како ќе изгледа новиот Изборен законик нема да зависи од мене, ќе се обидам максимално професионално да биде спроведена подготовката. Тоа значи дека би се движело во таа насока, евентуално, претседателот на работната група да не биде член на политичка партија и да има човек кој ќе му помага, на пример странски експерт. Како ќе изгледа моделот на политичкиот систем преку кој се избираат пратениците или претставниците во државата нема да зависи од мене како министер, туку од работната група, понудените решенија, идеи и аргументација – рече министерот.
Работата на работните групи, според Тупанчески, ќе почне во многу брз, краток временски интервал.
