Македонија е подготвена за најважниот натпревар на Европското првенство, во кој ќе игра против Украина (од 15 часот). Ова е дуел на селекции кои беа поразени во првото коло. Селекторот Игор Ангеловски истакна дека тимот е подготвен за она што следува, за најважниот меч кој веројатно оваа генерација ќе го игра.
– Најважната лекција е дека повторно веруваме дека имаме квалитет, затоа што до 80-та минута имавме активен резултат против Австрија. Не се браневме, не игравме бункер дури имавме и ситуации да поведеме. Сепак, тоа не успеавме да го направиме, примивме гол по пад на концентрација. Сепак, следува меч со Украина, мислам дека имаме ситуација во која можеме да се поправиме на резултски план – вели Ангеловски.
Тој ја посочи целта за пласман во втората фаза на ЕП.
– Дојдовме на ЕУРО со цел да се пласираме во втората фаза и таа фаза за нас е активна. Имаме пред нас ривал кој исто така има нула бодови, што значи дека ова за нас е финале. И да не успееме нема да биде трагедија, а нормално дека ќе дадеме се од себе. Украинците се квалитетни, тоа го покажаа и против Холандија. Имаат одлични индивидуалци, но и ние имаме квалитет и покажавме дека можеме да се носиме со сите – смета селекторот.
