Овче Поле е регион што воодушевува со природните ресурси и културното наследство и предизвикува со економскиот потенцијал со кој располага. Промоцијата на значењето на Овчеполието во изминатата деценија се одвиваше преку книги, научни истражувања, медиумски промоции и културни настани од авторот Никола Ристевски.
Откако во 2020 година беа објавени кратките документарни филмови „Овчеполско оро“ и „Свети Николе – главната населба во Овчеполската Котлина“, во почетокот на 2021 година Свети Николе и Овче Поле добија нови промотивни видеа, во продукција на „Аристон“.
На Јутјуб се објавени првите епизоди од новата документарна серија за Овче Поле, насловена „За овчеполските работи“. Со кратките документарни филмови, Овче Поле првпат добива соодветна видеопромоција преку претставување и прикажување на природните ресурси, културното наследство и економскиот потенцијал на Овчеполскиот Регион. Големата и плодородна Овчеполска Котлина е инспирација за работата на продукцијата „Аристон“, а серијата што се објавува на интернет претставува најава за долгометражниот документарен филм за Овчеполието.
Кратките документарни филмови „Градиштето кај селото Кнежје“, „Ѓуриште“, „Овчеполскиот геоглиф“ , „Овче Поле“ ја отсликуваат убавината на Светиниколско.
Филмот „Градиштето кај селото Кнежје“, за археолошки локалитет Билазора, е поддржан од Општина Свети Николе, снимен со дозвола од Управата за заштита на културното наследство.
Во продукција на „Аристон“ неодамна се објавија и кратки видеа инспирирани од
„Кратовско-злетовската област“, регион во Македонија што изобилува со културно наследство и природни ресурси, серија во која се опфатени локалитетот Куклица, Лесново, Кратово.
– Во овие предели патниците намерници и туристите доаѓале, доаѓаат и ќе доаѓаат. По претставувањето на книгата „Зборник за Кратово – книга прва“ и почнувањето на подготовките за изданието „Зборник за Лесново и Злетово“, овие краишта на Македонија почнуваат да добиваат и нови видеозаписи за промоција на потенцијалите со кои располагаат. Продукцијата „Аристон“ објави неколку кратки видеа со кои ги најавува документарниот филм и документарната серија за Кратовско-злетовската област – информира Никола Ристевски.
