Министерката за труд и социјална политика, Јагода Шахпаска, денеска се сретна со новите членови на Комисијата за спречување и заштита од дискриминација, кои добија поддршка од пратениците во Собранието со 61 глас „за“.
– Законот за спречување и заштита од дискриминација е законско решение кое беше поддржано и од власта и од опозицијата. Комисијата за спречување и заштита од дискриминација која произлегува од ова законско решение треба да постапува натпартиски, непристрасно и независно, со нула толеранција кон сите облици на дискриминација. Конечно ќе испорачаме правда кон граѓаните – рече Шахпаска.
Таа посочи дека преку изборот на новите членови на Комисијата за спречување и заштита од дискриминација, која за првпат ја сочинуваат професионалци со искуство во полето за човековите права, се враќа довербата на граѓаните.
– Создавање независна, професионална и ефикасна Комисија за спречување и заштита од дискриминација, чијашто задача ќе биде заштита на граѓаните кои се дискриминирани по кој било основ е потврда за нашите заложби во градењето на еднакво општество за сите – рече Шахпаска.
