Русија започна да ги враќа украинските воени бродови запленети на 25. ноември минатата година во Керчкиот проток, соопштија руските власти.
– Почна операцијата за враќање на бродовите – рече руски извор за агенцијата „Тасс“, a пренесува „Танјуг“.
Телевизијата „Крим24“ објави дека бродовите биле транспортирани со моторни чамци на Руската безбедносна служба на Крим и ќе бидат предадени на Украина кај ‘ртот Тарханкут.
Пред скоро една година, три украински бродови што минуваа низ Керчката теснина на патот кон Мариупол, беа запленети бидејќи, како што тврдат руските власти, немале дозвола да пловат во руски територијални води.
