Како дел од проектот „Алпин солар“, успешно беа поставени 5.000 соларни панели на браната лоцирана на езерото Матси во Швајцарија. Браната се наоѓа на 2.500 метри надморска височина, што значи дека е највисока во Европа. Производството на енергија веќе започна. Со проекти како „Алпин солар“, кој беше создаден со инвестиции на три компании, Швајцарија ја започна својата голема транзиција од нуклеарна во зелена енергија, како што беше планирано во 2011 година. Швајцарија претходно произведе огромна „батерија за вода“ за складирање на обновливата енергија.
Браната се наоѓа во швајцарскиот кантон Гларус, а е опкружена со врвови покриени со снег. Целта на проектот е да се произведуваат 3,3 милиони киловати енергија годишно за напојување 700 домаќинства. На ѕидовите на браната се поставени 5.000 соларни панели, а браната е и „дом“ на хидроцентралата. Ширината на инсталацијата на соларните панели е еден километар, а низата е дизајнирана да произведува 2,2 мегавати електрична енергија.
Енергетската компанија „Акспо“, која учествуваше во заедничкиот проект, користеше двослојни стаклени соларни модули произведени од швајцарската компанија „Мегасол“. Тие имаат рамки од 40 мм и можат да се справат со снежните оптоварувања што се очекуваат на швајцарските Алпи.
Иако поставувањето соларни панели на планините покриени со снег може да изгледа контраинтуитивно, „Aкспo“ очекува тие да имаат подобри перформанси во овие региони, особено во зима. Причината е што, за разлика од пониските надморски височини, каде што доминира магла во зимските месеци, на повисоки надморски височини во Швајцарија сјае сонце. Дополнителна предност е белиот снег, кој ја рефлектира сончевата светлина на соларните панели, што исто така создава повисоки приноси при работа на пониски температури. На овој начин се очекува да произведе трипати повеќе енергија во зимските месеци, како февруари и март, во однос на остатокот од годината.
Во наредните години се планира изградба на 4.200 соларни проекти во ниските и планинските региони на Швајцарија. Минатата година владата на земјата го измени својот закон за енергија за да дозволи побрзо одобрување за нови соларни централи во земјата, пренесува „Ројтерс“.
