Телото испраќа јасни сигнали
Температурите во термометрите дивеат, асфалтот е жежок, а првиот и најважен совет што ќе го слушнете деновиве е: Пијте многу вода! Иако сите знаеме колку е клучна хидратацијата за преживување на летните горештини, едно прашање сепак предизвикува голема конфузија – колку вода е всушност „доволно“.
Ако сè уште слепо се водите по старото универзално правило „осум чаши вода дневно“, време е да ги промените вашите навики. Денес експертите предупредуваат дека ова правило едноставно не држи вода, бидејќи потребите на нашето тело не се исти за секого.
Заборавете на универзалните правила
Телото на ситна жена што го поминува денот во климатизирана канцеларија и телото на покрупен маж што физички работи на отворено не може да има иста потреба од течност. Колку вода ќе изгубите со потење и дишење зависи од повеќе фактори: телесната тежина, полот, возраста, нивото на физичка активност, но и од тоа што јадете тој ден и дали земате одредени лекови. Кога живата во термометарот ќе надмине 30 степени, потребата за течност драстично се зголемува, но и тогаш внесувањето треба да се приспособи на сопственото тело.
Иако секој организам има своја приказна, постои едноставна формула што може да послужи како одличен водич. Научниците препорачуваат внесување од приближно 30-35 милилитри вода на килограм телесна тежина. Затоа, лице со тежина од 70 килограми во нормални услови треба да пие околу 2,1 до 2,4 литри течност дневно.
Сепак, во лето таа бројка треба да се зголеми. Доколку останувате на сонце, многу се потите или спортувате, слободно додајте уште еден литар вода на основната мерка. Важно е да се напомене дека треба да пиете вода во мали голтки во текот на денот, а не половина литар одеднаш кога веќе чувствувате неподнослива жед.
Телото испраќа сигнали
Многу луѓе пијат вода само кога се жедни, но експертите предупредуваат дека чувството на жед е всушност одложен аларм – тоа значи дека вашето тело е веќе малку дехидрирано. Првите знаци на недостиг од течност често се кријат; тоа може да биде необјаснет замор, губење концентрација, нервоза или досадна главоболка.
Сепак, најсигурен показател за вашата хидратација е – одењето во тоалет. Бојата на урината непогрешливо ја открива состојбата на вашето тело. Ако урината е светложолта, речиси транспарентна, вие сте на вистинскиот пат. Но ако е темножолта или малку заматена, вашето тело ве моли итно да посегнете по чаша вода.
На екстремна топлина мора редовно да се пие вода, дури и пред да се појави изразена жед
Добрата вест е дека не мора да ги внесувате сите течности што ви се потребни само со пиење обична вода. Околу 20 проценти од дневните потреби телото ги „извлекува“ од храната. Летото е особено богато со лубеници, дињи, краставици, праски и домати, кои се полни со вода и се совршен додаток на вашето летно мени. И конечно, важно е да се отфрли уште еден мит – можете да претерате со водата! Внесувањето огромни количества вода за кратко време може да ги исфрли клучните електролити од телото, особено натриумот, што може да доведе до опасна состојба позната како хипонатремија (т.н. интоксикација со вода). Затоа, бидете паметни за време на жештините: слушајте го вашето тело, секогаш имајте шише вода со вас и пијте рамномерно во текот на денот.
