Италија и Германија застанаа зад Шпанија по медиумските извештаи дека САД разгледуваат можни мерки против Мадрид поради несогласувањата околу војната со Иран, објави „Ројтерс“.
Според агенцијата, повикувајќи се на извор запознаен со ситуацијата, во интерен електронски документ на Пентагон се разгледуваат повеќе опции, меѓу кои и ограничување на улогата на Шпанија во рамките на НАТО, поради нејзиниот став за конфликтот.
Италијанската премиерка Џорџа Мелони изјави дека Алијансата мора да остане обединета.
– Мислам дека НАТО мора да остане обединет. Тоа е нашата сила – изјави Мелони на самитот на ЕУ во Никозија.
Поддршка за Шпанија изрази и Германија, при што портпарол на германската влада нагласи дека членството на Мадрид не е доведено во прашање.
– Шпанија е членка на НАТО и не гледам причина тоа да се промени – изјави портпаролот.
Владата на Педро Санчез се противи на воените активности на САД и Израел против Иран, што предизвика тензии со администрацијата на американскиот претседател Доналд Трамп.
Според „Ројтерс“, засега станува збор за интерни дискусии во САД, а договорот на НАТО не предвидува формална суспензија или исклучување на членка од Алијансата.
