По пријави на родители и вработени
Брутален третман на бебиња кои биле тепани се случувал во градинка во северниот дел на Белгија, според пријави и жалби на вработени и родители. Бебиња биле држени со главата под вода за да престанат да плачат, насилно биле хранети кога одбивале да јадат, а скандалот во оваа градинка го потврдил Одделот за детство во северниот дел на Белгија.
Како што јави дописничката на МИА од Брисел, градинката е затворена минатата недела откако родителите пријавиле дека нивните деца биле малтретирани и злоставувани, а дел од вработените дале отказ.
Грозоморните случаи се откриени во градинка во Фландрија, северниот регион на Белгија, открија медиумите. Двомесечно бебе било затворено во кујната затоа што „премногу плачело“, други бебиња и деца биле тепани, некои од нив насилно се држеле под студена вода за да престанат да плачат или насилно им се давало храна. Идентификувани се случаи на деца кои, кога ставале раце во тоалетот, им се буткала главата во ВЦ-школката и се пуштала вода врз нив.
Истрагата е отворена во октомври минатата година, по повеќе поднесени жалби, од родители и од вработени, а инспекции имало во март и април оваа година.
Градинката била конечно „итно“ затворена минатиот четврток.
Според белгиските медиуми, еден од раководителите во градинката изјавил дека „вистина некогаш ги држиме одзади децата за да им помогнеме да јадат“, одговарајќи на обвинувањето дека насилно се хранеле децата држејќи им ги главите превртени наназад во скутот на „негувателите“.
Политичките партии бараат одговори и темелна истрага и бараат присуство на надлежната министерка на парламентарна седница за прашања.
