Триесет и осум години по рецензијата со една ѕвезда на покојниот критичар, актерката изјави колку е изненадена од тврдењето, бидејќи самата избрала да го прикаже „злоупотребениот“ лик на Дороти Валенс во култната крими-мистерија на познатиот режисер
Изабела Роселини зборува за скандалозната критика на Роџер Еберт за „Синиот сомот“
Речиси 40 години по рецензијата на култниот филмски критичар, сега веќе покојниот Роџер Еберт, во која доби само една ѕвезда за „Синиот сомот“ на Дејвид Линч и во која тој тврдеше дека Изабела Роселини е деградирана, ѕвездата на филмот зборува за тоа колку таа верува дека процената на Еберт била неточна.
Зборувајќи за „Индивајар“, Роселини рече дека не ги читала критиките за „Синиот сомот“ кога излегол филмот, затоа што „дури и ако рецензијата е добра, секогаш има една реченица што е негативна и останува во тебе засекогаш“. Сепак, зборовите на Еберт беа неизбежни, бидејќи ѝ беше кажано дека неговата рецензија потенцира дека Линч, кој во тоа време ѝ бил партнер на Роселини, ја експлоатирал.
– Бев изненадена, бидејќи тогаш бев веќе возрасна. Имав 31 или 32 години. Избрав да го играм ликот – се сеќава таа.
Во филмот, Роселини ја игра Дороти Валенс, која е силувана и злоупотребувана од гангстерот Френк Бут (Денис Хопер), кој исто така ги киднапирал нејзиниот сопруг Дон и синот Дони.
– Од Роселини се бара да прави работи во овој филм што бараат вистински нерви. Во една сцена, таа е јавно засрамена. Таа е фрлена гола на тревникот на полицискиот детектив. Во други, од неа се бара да прикаже емоции што замислувам дека повеќето актерки не би ги допирале – напиша Еберт во својата рецензија.
Тој продолжува: „Таа е понижена, тепана, натерана непотребно да се разголи пред камерата. И кога барате од актерката да ги издржи тие искуства, треба да ја задржите вашата страна на зделката ставајќи ја во важен филм“.
Гледајќи наназад на својата улога, Роселини го бранеше нијансираниот начин на Линч на пишување на ликот.
– Мислам дека јас бев првиот лик на злоупотребена жена во филм на Дејвид Линч. Ликот на Дороти Валенс беше портрет на злоупотребувана жена, но таа се камуфлираше зад она што од неа се бараше, што беше секси и убаво. Јас ја послушав наредбата на режисерот верувајќи во неговите добри и професионални намери, не сметајќи дека притоа правам некаква жртва – рече Роселини.
Таа продолжи: „Во тоа лежи сложеноста на ’Синиот сомот‘, но и големиот талент на Дејвид Линч. Мислев дека направи фантастичен филм. Го сакам овој филм и по толку години“.
„Синиот сомот“ беше четвртиот филм на Дејвид Линч. Авторот и Роселини доживеаја романса за време на снимањето на филмот во 1985 година и нивната врска траеше четири години. Двајцата останаа блиски пријатели до ден-денес.
