Извинувањето следува по гневот меѓу католиците и другите верски заедници за делот од церемонијата на отворање на Летните олимписки игри во Париз што го сметаа за исмејување на библиска сцена
Извинување поради контроверзната изведба на отворањето на ЛОИ во Париз
Организацискиот одбор на Летните олимписки игри (ЛОИ) во Париз им се извини на католиците и на другите христијански верски заедници што беа огорчени од сцената за време на церемонијата на отворањето што ја евоцира уметничката слика „Последната вечера“ на Леонардо да Винчи, со драг-кралици, трансродова манекенка и пејач претставен како грчкиот бог на виното, пренесуваат светските медиуми.
Прославата на толеранцијата понудена како оправдување за несаканата пародија
Несаканата пародија на библиската сцена, изведена на заднината на реката Сена, всушност имаше цел да го протолкува Дионис и да ја издигне свеста „за апсурдноста на насилството меѓу луѓето“, напишаа организаторите на социјалната мрежа Икс.
Комитетот беше принуден да се извини откако настапот предизвика бес кај католиците, христијанските групи и конзервативните политичари низ светот.
– Јасно е дека никогаш немало намера да се покаже непочитување кон која било религиозна група. Церемонијата на отворањето се обиде да ја прослави толеранцијата на заедницата. Веруваме дека оваа амбиција е остварена. Ако луѓето се навредиле, навистина ни е жал – рече портпаролката на Париз 2024, Ен Декамп, на прес-конференција.
Томас Жоли, уметничкиот директор што стои зад церемонијата на отворање, рече дека религиозната субверзија никогаш не била негова намера.
– Сакавме да зборуваме за различноста. Различноста значи да се биде заедно. Сакавме да ги вклучиме сите, толку едноставно – посочи тој во саботата.
Франција има богато католичко наследство, но има и долга традиција на секуларизам и антиклерикализам. Богохулењето е легално и многумина го сметаат за суштински столб на слободата на говорот. Поддржувачите на табуто ја пофалија пораката за инклузивност и толеранција.
Реагираа верските заедници и светските лидери
Католичката црква во Франција, пак, соопшти дека изразува жалење за церемонијата, која „вклучува сцени на потсмев и исмејување на христијанството“. Монсињор Емануел Гобилијар, делегат на бискупите на Франција за Игрите, рече дека некои француски спортисти имале проблеми со спиењето поради последиците од контроверзноста.
Надбискупот Чарлс Сциклуна, највисокиот католички функционер во Малта и службеник на моќната доктринарна канцеларија на Ватикан, истакна дека контактирал со францускиот амбасадор во Валета за да се пожали за навредата.
Италијанската бискупска конференција рече дека она што требаше да биде прослава на француската култура доби „неочекувано негативен пресврт, станувајќи парада на банални грешки, придружени со прости и предвидливи идеологии“.
– Не земајте нè за моралистички фанатици, но која е поентата да мора да го доживеете секој глобален настан, дури и спортски, како да е геј-парада – се наведува во напис на дневниот италијански весник „Авенире“ поврзан со Католичката црква.
Поранешниот американски претседател и актуелен републикански претседателски кандидат Доналд Трамп ја нарече церемонијата на отворањето на ЛОИ во Париз „срамота“.
– Јас имам многу отворен ум, но мислам дека тоа што го направија е срамота – изјави Трамп за „Фокс њуз“, додавајќи дека, доколку биде реизбран за претседател, „нема да имаме ‘Тајна вечера’ прикажана на начинот на кој тие ја прикажаа“ на ЛОИ во Лос Анџелес во 2028 година.
Матео Салвини, лидерот на екстремно десничарската Лига, партија во коалициската влада на италијанската премиерка Џорџа Мелони, го опиша сегментот како „беден“.
– Отворањето на Олимпијадата со навреда на милијарди христијани низ светот беше навистина лош почеток, драги Французи – порача Салвини.
А унгарскиот премиер Виктор Орбан зборуваше за „моралната празнина на Западот“.
Некои коментатори рекоа дека контроверзноста е уште еден пример за културолошките војни во 21 век, дополнително турбо поттикнати од 24-часовнииот циклус на вести и социјалните мрежи. Р.С.
Понудено поинакво објаснување за спорниот дел од церемонијата
Не била прикажана „Тајната вечера“ туку „Пир на боговите“?!
Одредени уметнички критичари и експерти се јавија со тврдења дека во уметничкиот перформанс за време на отворањето на Летните олимписки игри во Париз, всушност, не станува збор за библиската сцена поврзана со Тајната вечера, туку за приказ од грчката митологија наречен „Пир на боговите“.
– Приказот на грчките богови што се забавуваат на врвот Олимп на церемонијата на отворањето на Летните олимписки игри предизвика конфликтни реакции во јавноста бидејќи првенствено конзервативните критичари погрешно тврдеа дека изведбата ја пародира познатата слика „Тајната вечера“ на Леонардо да Винчи, со што ги исмева христијанските верувања – се наведува во алтернативното објаснување пренесено во дел од светските медиуми.
И уметничкиот директор на церемонијата на отворањето Томас Жоли понуди слично објаснување.
– Прво и најважно, Бахус е богот на славењето во грчката митологија и табуто се нарекува „Прослава“. Тој исто така е бог на виното, што претставува еден од симболите на Франција и татко на Секвана, божицата на реката Сена… Идејата беше да се прикаже голема паганска прослава, поврзана со боговите на Олимп, а со тоа и со Олимпијадата – рече Жоли. Р.С.
