Дирекцијата за заштита и спасување (ДЗС) оваа сезона влегува доста поподготвена од тоа што беше лани. Со првиот авион веќе има интензивни тренинзи, в петок ќе има заедничка активност со МВР за гасење на пожари на отворено, истакна директорот на Дирекцијата за заштита и спасување, Беким Максути.
– Веќе со првиот авион којшто е вратен имаме интензивни тренинзи со сите луѓе коишто се дел од авио одделението. Еве за волја на вистината, ние в петок имаме заедничка активност со МВР, со нивните хеликоптери за гасење на пожари на отворено – истакна Максути на денешната свечена церемонија на донација од романската Влада, одговарајќи на новинарски прашања во врска со подготвеноста на дирекцијата во случај на пожари и други непогоди за време на ова лето.
Ќе ги пробаме и нашите капацитети, рече Максути, како што се дополнителни пумпи, црева и базен со којшто можат хеликоптерите да полнат вода и да фрлаат на одредено место, и нашите воздухоплови ќе бидат вклучени.
Во врска со вториот авион кој е на поправка во Шпанија, директорот на ДЗС информираше дека е спремен веќе една недела но не може да се испорача поради загинувањето на еден пилот откако се урна нивниот авион при гасење на пожарите во Португалија.
– Не се во можност да го испорачат. Значи дополнително секој ден сме на координација затоа што тоа е нивна обврска по договорот да ни го испорачаат авионот што е можно побрзо. Значи сите процедури околу вториот авион се завршени, комплетиран е со царински постапки, со се, чека само да ни кажат кој пилот да се качи на истиот, да добие дозвола АЦВР – вели Максути.
За третиот авион рече дека е таму веќе отворен, се работи и што поскоро ќе биде, но како што наведе Максути, најголеми проблеми во моментот имаат Португалија, Шпанија и Франција и Грција нормално не треба да ја заборавиме во сето тоа.
– Сакам да упатам апел дека ДЗС во однос на подготовките што треба да ги превземе како институција за да им помогне зашто не сме првиот респондер, не сме првиот одговарач кон еден пожар, него сме последниот, ги има преземено сите неопходни мерки и во однос на купување на возила коишто веќе процедурата е при крај и чекаме што поскора испорака на теренски возила со пумпи коишто ќе ги распоредиме по ТПЕ и со дополнителна друга опрема која што веќе е дадено и веќе имаме неколку состаноци заеднички и со ЦУК и со МВР и со Локалната самоуправа посебно во беровскиот дел каде што ги видовме сите пречки, проблеми и недостатоци од ланската година, за да оваа година влегуваме многу поодговорни пред се – кажа Максути.
Тој потсети дека развиените земји како што се Франција, Португалија и Грција коишто имаат големи пожари секоја година поседуваат многу поголем буџет во последните години во опремување против пожари и непогоди.
– За период од 20 години оние веќе имаат потрошено над милијарда и пол евра, а само од период од пет годни за да го појачат нивниот авио капацитет имаат оставено 800 милиони евра. ДЗС има само 4,5 милиони евра буџет – подвлече Максути.
На прашањето колку возила има во моментот, директорот на ДЗС информираше дека 15 возила се во прашање со пумпите коишто ќе бидат распоредени по ТПЕ на градовите коишто спаѓаат во републички сили.
