Бугарија нема да прави отстапки за договорите со Македонија, порача бугарската потпретседателка, Илијана Јотова, која вчера на враќање од Косово допатува во Скопје на средба со претставници на бугарската заедница во Македонија.
Средбата се случуваше во зградата на бугарската амбасада во Скопје, пришто Јотова им се заблагодари на македонските Бугари за храброста да ја бранат, како што рече, својата бугарска самосвест.
-Ако Бугарите не бидат запишани во Уставот, ви велам – нема да има ниту педа напредок во преговорите на Северна Македонија за европско членство. Нема да има меѓувладина конференција, нема да има извештај од страна на ЕК и мисијата на ЕК, со кои ќе се почнат вистинските преговори – рече таа, пренесе бнр.бг.
Јотова се поклони на барелјефот на Васил Левски на зградата на бугарската амбасада во земјава.
-Правата за кои се бореше Левски се актуелни и денес. Конкретно за бугарската заедница во Македонија, која се соочува со различни предизвици и се бори за своите права, Бугарија цврсто стои зад вас – рече Илијана Јотова.
Во врска со охриѓанецот Христијан Пендиков, бугарската потпретседателка најави дека покрај станот и обезбедувањето, бугарската држава ќе му овозможи и студирање во Софија.
