Претседателот на Стопанската комора Бранко Азески е именуван за придружен член на Европскиот економски и социјален комитет (ЕЕСК) за 2024 година, во рамките на иницијативата на Европскиот економски и социјален комитет за вклучување претставници од земјите кандидати за членство во ЕУ во структурата на организацијата. Преку иницијативата за вклучување претставници од земјите членки што сè уште не се членки на ЕУ во својата структура, ЕЕСК е првата институција на ЕУ што на земјите кандидати им понуди специфична можност за вклучување и учество, која е предвидена како една од целите на новиот план за раст на Западен Балкан, за инклузивна интеграција на економиите од Западен Балкан кон ЕУ.
Во текот на 2024 година, како дел од Европскиот економски и социјален комитет, Азески ќе има можност да учествува во целиот процес на подготвување мислења на ЕЕСК (учество во студиски групи, учество на состаноци на секциите и пленарни сесии, со што се заокружува процесот на ЕЕСК за подготвување мислење) и да обезбедува придонес во процесот на подготвување голем број избрани мислења на ЕЕСК (легислативи, истражувачки или мислења со сопствена иницијатива) за теми каде што нивното учество е особено важно, како што се важни законодавните мислења поврзани со проширувањето, мислењата за прашања од паневропска и глобална важност и водечките мислења на ЕЕСК од општа природа.
Активното вклучување на претседателот на Стопанската комора директно во работата на органите и телата на Европската Унија е во насока на остварување на поставените цели на Комората да обезбедува советодавна поддршка и насоченост на македонските компании во процесот на пристапување кон ЕУ и остварување на визијата на Комората на иднината, во функција на членките.
ЕЕСК е составен дел на ЕУ, формиран во 1957 година со договорот од Рим, како советодавно тело на Унијата, кое има цел граѓанските организации, невладиниот и приватниот сектор на европско ниво да имаат активно учество во развојот на ЕУ. ЕЕСК е единствен форум за консултации, дијалог и консензус помеѓу претставниците од сите сектори на организираното граѓанско општество. Целта на ЕЕСК е да помогне да се осигура дека креирањето политики и законодавството на ЕУ се подемократски и поефикасни и вистински ги одразува потребите на граѓаните и бизнисите од ЕУ. Значителен број иницијативи на ЕУ за законодавство мора да се достават до ЕЕСК за задолжително мислење пред нивното усвојување.
Со седиште во Брисел, ЕЕСК е составена од 329 члена од сите 27 земји членки на ЕУ, кои претставуваат здруженија на работодавци, индустрија, стопански комори, здруженија на мали и средни претпријатија (МСП), синдикати, потрошувачи, земјоделци, либерални професии, борци за попреченост, академија, групи за правата на жените, екологисти, задруги, младински организации, организации за човекови права итн. Севкупно, ЕЕСК обединува околу 250 организации и мрежи на национално ниво, кои претставуваат милиони граѓани на ЕУ. ЕЕСК е составена од три групи: Група на работодавци, Група на работници и Група на граѓански организации. E.Р.