Претседателот на САД Доналд Трамп денеска изјави дека е малку веројатно повторно да нареди американски воени напади врз Иран сè додека има напредок во преговорите за нуклеарната програма на Техеран и повторното отворање на Ормутскиот Теснец.
Тој го повтори тоа тврдење неколку пати за време на интервју за „Си-ен-ен“, велејќи дека сè зависи од подготвеноста на Иран да соработува.
– Би го направил тоа доколку е потребно, но ние ги погодивме навистина силно. Затоа е малку веројатно дека ќе морам повторно да го направам тоа. Тие банкротираат – рече Трамп.
Според него, американските сили се подготвени да нападнат доколку биде потребно да се преземат мерки.
– Имам три носачи на авиони таму. Третиот штотуку пристигна. Тие се целосно подготвени и вооружени – рече Трамп.
Тој, исто така, изјави дека САД идентификувале инфраструктурни цели во Иран во случај на повторни воени дејствија, вклучувајќи електрани и мостови.
– Имаме 38 мостови на нишан што можеме да ги уништиме буквално за еден час – рече американскиот претседател.
Тој додаде дека би сакал да избегне уништување на инфраструктурата на Иран.
Зборувајќи за способноста на Иран да се одбрани од нови американски напади, Трамп рече дека воздушната одбрана на Иран е уништена.
– Ние сме незапирливи, бидејќи тие немаат противвоздушна опрема. Целата нивна противвоздушна одбрана е исчезната – рече тој.
