Бројот на евидентирани случаи на ебола во Демократска Република Конго достигна 10.060, додека 4.887 лица починале од болеста од почетокот на епидемијата во средината на мај, соопштија здравствените власти.
Водечката здравствена агенција во Африка ја оцени епидемијата како најбрзо растечка на ебола досега.
Случаи на варијантата „Бундибуџио“ се потврдени и во Кенија и Нигерија. Во Кенија досега се регистрирани девет заразени лица и два смртни случаи. Според информациите, ширењето на вирусот е поврзано со пациент кој од Конго патувал преку Уганда до главниот град Најроби, пренесе „Си-ен-ен“.
Нигерија го потврди првиот случај на 20 октомври. Станува збор за швајцарска државјанка која пристигнала во земјата од Уганда. Надлежните продолжуваат со истрагата за да утврдат каде точно се заразила жената.
Во Уганда, за време на актуелната епидемија, биле потврдени вкупно 20 случаи на ебола, сите поврзани со пациент од Конго. Двајца од заразените починале. Уганда на крајот на август прогласила крај на епидемијата, откако во период од 42 дена не биле откриени нови случаи.
Еболата се пренесува преку директен физички контакт со заразено лице или преку контакт со неговите телесни течности. Болеста може да предизвика висока температура, дијареја и крвавење и бара брзо откривање и соодветен медицински третман.
